ތުރުކީގެ ހުޅަަނގަށް ބާރުގަދަ ބިންހެލުމެއް އަތުވެއްޖެ

ތުރުކީގެ ހުޅަނގު ސަރަހައްދަށް، ރިކްޓަރ މިންގަނޑުން 6.1 ގެ ބާރުމިނުގައި ބާރުގަދަ ބިންހެލުމެއް އަތުވެއްޖެއެވެ.

މި ބިންހެލުން އައިސްފައިވަނީ ރޭ އިސްތަންބޫލް ގަޑިން 7:53 ހާއިރު، ބަލިކެސިރް ޕްރޮވިންސްގެ ދެކުނު ސަރަހައްދަށެވެ.

އެމެރިކާގެ ޖިއޮލޮޖިކަލް ސާވޭ (ޔޫއެސްޖީއެސް) އިން ހާމަކުރި ގޮތުގައި، މި ބިންހެލުމުގެ އެޕިސެންޓަރަކީ ބަލިކެސިރް ސިޓީގެ 48 ކިލޯމީޓަރު ދެކުނުގައިވާ ސަރަހައްދެކެވެ. އަދި ބިންހެލުން އައިސްފައިވަނީ ކަނޑުގެ އަޑިން 11 ކިލޯމީޓަރުގެ ފުންމިނުންނެވެ. ބިންހެލުމުގެ ސަބަބުން އެ ސަރަހައްދުގެ ރައްޔިތުންގެ މެދުގައި ބިރުވެރިކަން އުފެދި، ގިނަ ބަޔަކު ވަނީ ގެއިން ބޭރަށް ނިކުމެފައެވެ.

މާހިރުން ފާހަގަކުރާ ގޮތުގައި، ބިންހެލުމުގެ ފުންމިން ތިލަވުމުގެ ސަބަބުން، އެޕިސެންޓަރާ ކައިރި ސަރަހައްދުތަކަށް ބިންހެލުން ވަރަށް ބާރަށް އިހުސާސްކުރެވުނެވެ. މި ބިންހެލުމުގެ އަސަރު ބަލިކެސިރްގެ އިތުރުން، އިސްތަންބޫލް، އިޒްމީރް، އަދި ބުރުސާ ފަދަ ބޮޑެތި ސިޓީތަކަށްވެސް ކޮށްފައިވެއެވެ.

ތުރުކީގެ ކާރިސާތަކާ ބެހޭ އިދާރާ، އާފާދު (AFAD) އިން ބުނާ ގޮތުގައި، މިހާތަނަށް ފުރާނައަށް ނުރައްކާވާ ފަދަ ބޮޑު ހާދިސާއެއް ރިޕޯޓްކުރެވިފައި ނުވި ނަމަވެސް، ބައެއް އިމާރާތްތަކަށް ކުދިކުދި ގެއްލުންތައް ލިބިފައިވާ ކަމުގެ ރިޕޯޓްތައް ވަނީ ލިބިފައެވެ. އަދި އޮފިޝަލުން ދަނީ ލިބުނު ގެއްލުންތަކުގެ ތަފްސީލު އެއްކުރަމުންނެވެ.

ތުރުކީއަކީ ނޯތު އެނަޓޯލިއަން ފޯލްޓް ލައިން އަދި އީސްޓް އެނަޓޯލިއަން ފޯލްޓް ލައިން ފަދަ ބޮޑެތި ފޯލްޓް ލައިންތަކެއްގެ މަތީގައި އޮންނަ ގައުމަކަށް ވުމުން، ދުނިޔޭގެ އެންމެ ބިންހެލުން ގިނަ ސަރަހައްދުތަކުގެ ތެރޭގައި ހިމެނެއެވެ. 2023 ވަނަ އަހަރު ތުރުކީގެ ދެކުނާއި ސޫރިޔާގެ އުތުރަށް އައި ބާރުގަދަ ބިންހެލުންތަކުގައި 50،000 އަށްވުރެ ގިނަ މީހުން މަރުވެފައިވާއިރު، މިފަހަރުގެ ބިންހެލުމާއެކު، ހާއްސަކޮށް އިސްތަންބޫލް ފަދަ އާބާދީ ބޮޑު ސިޓީތަކަށް ބޮޑު ބިންހެލުމެއްގެ ނުރައްކާ އޮތްކަމުގެ ހަނދާންތައް އަލުން އާވެގެން ގޮސްފައިވާ ކަމަށް ތުރުކީގެ މީޑިއާތަކުން ފާހަގަކުރެއެވެ.