ހުއްދަ ނުހޯދައި މާލޭ މަގެއްގެ ދުވާރު މަތީ މަސައްކަތްކުރި ބަޔަކު ޖޫރިމަނާކޮށްފި

މާލޭ ސިޓީ ކައުންސިލުން ނަގަންޖެހޭ ހުއްދަ ނުނަގައި، ގަވާއިދާ ޚިލާފަށް ދުވާރުމަތީގައި މަސައްކަތްކުރި ބަޔަކު މާލޭ ސިޓީ ކައުންސިލުން ޖޫރިމަނާކޮށްފިއެވެ.

މި މައްސަލައިގައި ޖޫރިމަނާކޮށްފައިވަނީ ބޮޑުތަކުރުފާނު މަގު ހ. މާދޫ ނަމަކަށް ކިޔާ ގެއެއްގެ މަސައްކަތް ކުރަމުންދިޔަ ފަރާތްތަކެވެ.

ސިޓީ ކައުންސިލުން މި ފިޔަވަޅު އަޅާފައިވަނީ މާލެ ސިޓީގެ މަގުތަކާއި ޕޭމެންޓުތަކާއި ބަނދަރުތަކާއި އާންމު ތަންތަނުގައި ގަވާއިދާ ޚިލާފަށް މަސައްކަތް ކުރުމުން، ޖޫރިމަނާ ކުރުމަށް ކައުންސިލަށް ލިބިދީފައިވާ ބާރުގެ ދަށުންނެވެ. ކައުންސިލުން ފޮނުވާފައިވާ ޗިޓުގައި ބަޔާންކޮށްފައިވާ ގޮތުގައި، ޖޫރިމަނާކުރި މައިގަނޑު ސަބަބަކީ ދުވާރުމަތީގައި ސިޓީ ކައުންސިލުގެ "ހުއްދަ ބޯޑު" ނުބަހައްޓައި މަސައްކަތް ކުރުމެވެ.

މި މައްސަލައިގައި ޖޫރިމަނާކޮށްފައިވަނީ ކޮން އަދަދަކުން ކަމެއް އަދި ކަށަވަރެއް ނުވެއެވެ. ނަމަވެސް މާލޭގައި ހުއްދަތައް ނުނަގައި، އަދި އެކަށީގެންވާ ރައްކާތެރިކަމުގެ ފިޔަވަޅުތައް ނާޅައި އިމާރާތްކުރުމުގެ މަސައްކަތްތައް ކުރުމަކީ މިހާރު މާލޭގައި ވަރަށް ބޮޑުވެފައިވާ މައްސަލައެކެވެ.

މިފަދަ ހާދިސާތަކަށް ބަލާއިރު، ދާދި ފަހުން ވެސް ހަދަމުންދިޔަ އިމާރާތެއްގެ މަތީން މީހަކު ވެއްޓި ޒަޚަމުވި މައްސަލައެއްގައި ކައުންސިލުން ވަނީ އިހުމާލުވި ފަރާތްތައް 5،000 ރުފިޔާއިން ޖޫރިމަނާކޮށްފައެވެ. މާލޭ ސިޓީ ކައުންސިލުން އަންނަނީ ހުއްދަ ނުހޯދައި މަގުމަތީގައި މަސައްކަތް ކުރުމާއި، ސަލާމަތީ ފިޔަވަޅުތައް ނާޅައި މަސައްކަތްކުރާ ފަރާތްތަކާ މެދު ހަރުކަށި ފިޔަވަޅުތައް އަޅަމުންނެވެ.