އިނގިރޭސިވިލާތުން 16 އަހަރުން ދަށުގެ ކުދިންނަށް އެނާޖީ ޑްރިންކް މަނާކުރަނީ

އިނގިރޭސި ސަރުކާރުން ހާމަކޮށްފައިވާ ގޮތުގައި، މި މަނާކުރުން ހިނގާނީ 150 މިލިގްރާމަށްވުރެ ގިނައިން ކެފެއިން އެކުލެވޭ ބުއިންތަކަށެވެ.

މި ގަވައިދަށް އަމަލުކުރަން ޖެހޭ ތަންތަނުގެ ތެރޭގައި ފިހާރަތަކާއި، ކެފޭ، ރެސްޓޯރެންޓް، ވެންޑިން މެޝިން އަދި އޮންލައިންކޮށް ތަކެތި ވިއްކާ ޕްލެޓްފޯމްތައް ހިމެނެއެވެ.

މި އުސޫލުގެ ދަށުން ރެޑްބުލް، މޮންސްޓާ، ރެލެންޓްލެސް އަދި ޕްރައިމް ފަދަ މަޝްހޫރު އެނާޖީ ޑްރިންކްތައް 16 އަހަރުން ދަށުގެ ކުދިންނަށް ވިއްކުން އެއްކޮށް މަނާވާނެއެވެ. ނަމަވެސް، ޑައިޓް ކޯކު ފަދަ ކެފެއިންގެ މިންވަރު ދަށް ބުއިންތަކަށް މި އުސޫލު ނުހިނގާނެ ކަމަށް ސަރުކާރުން ބުނެއެވެ.

ތަފާސްހިސާބުތަކުން ދައްކާގޮތުގައި އިންގްލޭންޑުގައި ދުވާލަކު ގާތްގަނޑަކަށް 100,000 ކުދިން ކެފެއިން ގިނަ އެނާޖީ ޑްރިންކްސް ބޭނުންކުރެއެވެ. މިފަދަ ބުއިންތަކުގެ ސަބަބުން ކުދިންގެ ނިދުމަށް ބުރޫއަރައި، ކަންކަމަށް ސަމާލުކަންދޭ މިންވަރު ދަށްވެ، ސްކޫލްގެ ނަތީޖާތަކަށް ނޭދެވޭ އަސަރު ކުރާކަން އެގައުމުގެ ކަމާބެހޭ ފަރާތްތަކުން ވަނީ ފާހަގަކޮށްފައެވެ.