އެމްޑީޕީއަށް ސޮއިކުރުމުން ތިނަދޫ ރައީސްގެ މަގާމު ގެއްލިއްޖެ ކަމަށް ކަނޑައަޅައިފި

ޑިމޮކްރެޓްސް އުވާލުމުން އެމްޑީޕީއަށް ސޮއިކުރުމާއި ގުޅިގެން، ވ. ތިނަދޫ ކައުންސިލްގެ ރައީސް ޝުޖާއު އަލީގެ މަގާމު ގެއްލިއްޖެ ކަމަށް ލޯކަލް ގަވަމެންޓް އޮތޯރިޓީ (އެލްޖީއޭ) އިން މިއަދު ކަނޑައަޅައިފި އެވެ. 

މިއީ އެންޓި-ޑިފެކްޝަން ގާނޫނުގެ ދަށުން ކައުންސިލަރެއްގެ ގޮނޑި ގެއްލުނު ފުރަތަމަ ފަހަރެވެ.

އެލްޖީއޭއިން ނެރުނު ނޫސްބަޔާނެއްގައި ބުނީ، ލޯކަލް ކައުންސިލް އިންތިހާބަށްފަހު ޝުޖާއު އިންތިހާބުވި ޕާޓީ ނޫން އެހެން ޕާޓީއެއްގައި މެއި 19، 2026 ގައި ދަފުތަރުވެފައިވާކަން އިލެކްޝަންސް ކޮމިޝަނުން އެ އޮތޯރިޓީއަށް އަންގާފައިވާ ކަމަށެވެ. ޝުޖާއު ކައުންސިލް އިންތިހާބުގައި ވާދަކުރެއްވީ ދަ ޑިމޮކްރެޓްސްގެ ޓިކެޓުގަ އެވެ. ނަމަވެސް ފަހުން އޭނާ ވަނީ އިދިކޮޅު އެމްޑީޕީއާ ގުޅިވަޑައިގެންފަ އެވެ.

ޝުޖާއު އިންތިހާބުވި ޕާޓީ ކަމަށްވާ ދަ ޑިމޮކްރެޓްސް، ގާނޫނީ ގޮތުން ލާޒިމުކުރާ އަދަދަށް މެންބަރުން ނެތުމުގެ ސަބަބުން އުވައިލިކަން އިލެކްޝަންސް ކޮމިޝަނުން އަންގާފައިވަނީ އޭޕްރިލް 11، 2026 ގައެވެ. އެލްޖީއޭގެ ބަޔާނުގައިވާ ގޮތުން، ގާނޫނުގައިވާ ހަމަތަކުގެ މަތިން ޝުޖާއުގެ ގޮނޑި ހުސްވެއްޖެ ކަމަށް ކަނޑައަޅައި، އެކަން އިލެކްޝަންސް ކޮމިޝަނަށް އެންގުމަށް އެލްޖީއޭގެ ބޯޑުން ވަނީ ނިންމާފަ އެވެ.

"ވ. ތިނަދޫ ކައުންސިލްގެ ރައީސް، ޝުޖާއު އަލީ މަގާމު ހުސްވެއްޖެކަން އިލެކްޝަންސް ކޮމިޝަނަށް އެންގުމަށް ޖޫން 30، 2026 ވަނަ ދުވަހު ބޭއްވި މި އޮތޯރިޓީގެ ބޯޑުގެ 2026 ވަނަ އަހަރުގެ އަށްވަނަ ބައްދަލުވުމުން ވަނީ ނިންމައިފަ އެވެ." އެލްޖީއޭގެ ބަޔާނުގައި ބުނެފައިވެ އެވެ.

މި މައްސަލާގައި ޝުޖާއުގެ ގޮނޑި ގެއްލިފައިވާ ކަމަށް ނިންމިއިރު، އެލްޖީއޭ އިން ވަކިގޮތެއް ނިންމަންދެން މިދިޔަ މަހުގެ ކުރީކޮޅުން ފެށިގެން އޭނާ ހުރީ ސަސްޕެންޝަނުގަ އެވެ. އެ މުއްދަތުގައި ކައުންސިލް ހިންގުން ވަގުތީ ގޮތުން ހަވާލުކޮށްފައި އޮތީ ކައުންސިލްގެ ނައިބު ރައީސްއާ އެވެ.

ޝުޖާއުއަކީ ރާއްޖޭގައި އިންތިހާބުވި ޕާޓީ ނޫން އެހެން ޕާޓީއަކަށް ސޮއިކޮށްގެން ގޮނޑި ގެއްލުނު ފުރަތަމަ ކައުންސިލަރު ކަމަށްވާއިރު، މިއީ ރާއްޖޭގެ ސިޔާސީ މަޝްރަހުގައި ފާހަގަކޮށްލެވޭ ނިންމުމެކެވެ. މި ނިންމުމާ ގުޅިގެން ތިނަދޫ ކައުންސިލްގެ ރައީސްގެ ގޮނޑި ހުސްވެފައިވާތީ، އެ ގޮނޑިއަށް މެންބަރަކު އިންތިހާބު ކުރުމަށް ބައި-އިލެކްޝަނެއް ބާއްވަން ޖެހޭނެ އެވެ.