މޯލްޑިވްސް މެޑިކަލް ކޮންފަރެންސް ފަށައިފި

ރާއްޖޭގައި އުމުރުން ދުވަސްވީ އާބާދީ އިތުރުވަމުންދާ މި ދުވަސްވަރު، އެ ފަރާތްތަކަށް ދެވޭ ސިއްހީ ހިދުމަތްތައް ހަރުދަނާކޮށް، ހޭލުންތެރިކަން އިތުރުކުރުމުގެ މަގްސަދުގައި ބާއްވާ "މޯލްޑިވްސް މެޑިކަލް ކޮންފަރެންސް" ރޭ ރަސްމީކޮށް ފަށައިފިއެވެ. ދެ ދުވަހުގެ މުއްދަތަށް ކުރިއަށް ގެންދާ މި ކޮންފަރެންސް ފައްޓަވައިދެއްވީ ހެލްތު މިނިސްޓަރު އަބްދުﷲ ނާޒިމެވެ.

މިއަހަރުގެ ކޮންފަރެންސްގެ މައިގަނޑު މަގްސަދަކީ، އުމުރުން ދުވަސްވީ މީހުންނަށް ދެވޭ ފަރުވާއަށް ހާއްސަ ސަމާލުކަމެއް ދިނުމާއި، މި ދާއިރާއިން ދިމާވާ ގޮންޖެހުންތަކާއި ކުރިއެރުންތަކާ މެދު މަޝްވަރާކުރުމެވެ. ރާއްޖޭގެ އާބާދީގެ ދުވަސްވީ ނިސްބަތް އިތުރުވަމުންދާތީ، މި ކޮންފަރެންސަކީ ވަރަށް މުހިންމު ފޯރަމެއްކަމަށް ސިއްހީ ދާއިރާގެ ތަޖުރިބާކާރުން ފާހަގަކުރައްވައެވެ.

މޯލްޑިވްސް މެޑިކަލް އެސޯސިއޭޝަންގެ އިސްނެގުމާއެކު ރާއްޖޭގައި ބާއްވާ މިފަދަ ދެވަނަ ކޮންފަރެންސްގައި، ރާއްޖޭގެ އެކި ހޮސްޕިޓަލްތަކުގައި މަސައްކަތްކުރައްވާ ޑޮކްޓަރުންނާއި، ސިއްޙީ ދާއިރާގައި މަސައްކަތްކުރައްވާ އެހެނިހެން ފަރާތްތަކުން ވެސް ބައިވެރިވެއެވެ. މި ކޮންފަރެންސަކީ ސިއްޙީ ދާއިރާގެ ފަންނީ މީހުންނަށް މަޢުލޫމާތު ބަދަލުކުރުމާއި، އާ ހޯދުންތަކާ ބެހޭގޮތުން ދެނެގަތުމަށް ލިބޭ ރަނގަޅު ފުރުސަތެކެވެ.

މިއަހަރުގެ "މޯލްޑިވްސް މެޑިކަލް ކޮންފަރެންސް" ގެ ޝިއާރަކީ "ޖެރިއެޓްރިކް، ލެޓްސް ޓޯކް އޭޖްޑް ކެއާ"އެވެ. މި ޝިއާރުން ދޭހަވަނީ އުމުރުން ދުވަސްވީ މީހުންނަށް ފޯރުކޮށްދޭ ފަރުވާގެ މުހިންމުކަން ރަމްޒުކޮށްދޭ އިރު، މިއީ ރާއްޖެއަށާއި އެހެން ގިނަ ގައުމުތަކަށް ވެސް ވަރަށް މުހިންމު ކަމެއް ކަމަށް އެ އެސޯސިއޭޝަނުން ފާހަގަކުރެއެވެ.

މި ކޮންފަރެންސަކީ ރާއްޖޭގެ ސިއްހީ ދާއިރާ ކުރިއެރުވުމަށް އަޅާ މުހިންމު ފިޔަވަޅެއް ކަމަށް ވެސް މޯލްޑިވްސް މެޑިކަލް އެސޯސިއޭޝަނުން ބުނެއެވެ. ބައިވެރިންނަށް ތަޖުރިބާކާރުންގެ ފަރާތުން މަޢުލޫމާތު ދިނުމުގެ އިތުރުން، އުމުރުން ދުވަސްވީ މީހުންނަށް ދެވޭ ފަރުވާގެ އެންމެ ފަހުގެ ހޯދުންތަކާއި، ބެސްޓް ޕްރެކްޓިސަސްތައް ހިއްސާކުރުމުގެ ފުރުސަތު މި ކޮންފަރެންސުން ލިބިގެންދާނެއެވެ.