ޑައިވަރުން ހޯދި އޮޕަރޭޝަންއަށް މަހެއްހާ ދުވަސް ފަހުން ބައިވެރިންގެ އަގުވަޒަންކޮށްފި

އަލިމަތާ ރިސޯޓް ކައިރީގައިވާ ކަނޑުއަޑީގެ ހޮހަޅައަކަށް މިދިޔަ މަހު 14 ވަނަ ދުވަހު ޑައިވްކުރަނިކޮށް ގެއްލުނު އިޓަލީގެ ފަތުރުވެރިން ހޯދުމުގެ އޮޕަރޭޝަން ހިންގިތާ މަހަކަށް ވުރެ ގިނަދުވަސް ވީފަހުން އެ އޮޕަރޭޝަންގެ ބައިވެރިންގެ އަގުވަޒަންކުރުމުގެ ގޮތުން ޚާއްސަ ހަފްލާއެއް ބާއްވައިފިއެވެ. 

އާންމު ގޮތެއްގައި މިކަލަ އޮޕަރޭޝަންތަކުގެ ބައިވެރިންނަށް ޝަރަފު އަރުވަނީ އެއިރެއްގައި ހުންނަ ރައީސުލްޖުމްހޫރިއްޔާއެވެ. ނަމަވެސް މަހަކަށް ވުރެ ގިނަ ދުވަސް ވީފަހުން ބޭއްވި މި ހަފްލާގައި ވެސް ރައީސް މުއިއްޒު ބައިވެރިއެއް ނުވެއެވެ.

ބަންޑާރަކޮށީގައި ބޭއްވި މި ރަސްމިއްޔާތުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ބަދަލުގައި ބައިވެރިވެވަޑައިގަތީ ހޯމް މިނިސްޓަރު އަލީ އިޙްސާނާއި ޑިފެންސް މިނިސްޓަރު ހަސަން ރަޝީދެވެ. އަދި ކޮމިޝަނާ އޮފް ޕޮލިސް އަހުމަދު މުހައްމަދާއި، ޗީފް އޮފް ޑިފެންސް ފޯސް މޭޖާ ޖެނެރަލް އިބްރާހީމް ޙިލްމީގެ އިތުރުން ފުލުހުންނާއި ސިފައިންގެ އިސް އޮފިސަރުން ވަނީ ބައިވެރިވެވަޑައިގެންފައެވެ.

ވ. އަތޮޅު ކައިރިއަށް ޑައިވިނަށް ގޮސް އުޅެނިކޮށް ގެއްލުނު އިޓަލީއަށް ނިސްބަތްވާ ފަތުރުވެރިން ހޯދުމަށް ބޭރުގެ ކަމާބެހޭ މާހިރުންވެސް ވަނީ ރާއްޖެ ގެނެސްފައެވެ. އެގޮތުން އިޓަލީ ސަރުކާރުގެ އެދުމުގެ މަތިން ރާއްޖެ އައި ފިންލޭންޑުގެ ތިން ތަޖުރިބާކާރުން މި އޮޕަރޭޝަނުގައި އިސްކޮށް ހަރަކާތްތެރިވެފައިވެއެވެ.

މި ނުރައްކާތެރި އޮޕަރޭޝަނުގެ ތެރެއިން ފަތުރުވެރިން ހޯދުމަށް ފީނަން ގޮސް އުޅުނު ސިފައިންގެ މީހަކު ވަނީ ނިޔާވެފައެވެ. މި ހާދިސާއާ ގުޅިގެން ބަލަންޖެހޭ ކަންކަން ފުލުހުން ދަނީ ތަހުގީގުކުރަމުންނެވެ.

ގެއްލުނު ފަތުރުވެރިންގެ ހަށިގަނޑު އެ ހޮހޮޅައިގެ ތެރެއިން ނަގާފައިވަނީ ނިމުނު މެއި މަހުގެ 20 ވަނަ ދުވަހުއެވެ. މި ހާދިސާ ހިނގިތާ ގިނަ ދުވަސްތަކެއް ފަހުން މިފަދަ އަގުވަޒަންކުރުމުގެ ހަފްލާއެއް ބޭއްވުނު ނަމަވެސް، މިއީ އެ އޮޕަރޭޝަނުގައި ބައިވެރިވި ފަރާތްތަކުގެ ހިތްވަރު ފާހަގަކުރުމަށް ބޭއްވުނު މުހިންމު ހަފްލާއެކެވެ.