އަމިއްލަ ޚަރަދުގައި ބޭސްފަރުވާއަށް ފުރާ ފަރާތްތަކަށް 1000 ޑޮލަރު ލިބޭނެ: ރައީސް

މިއަހަރުގެ އޮގަސްޓް 1 އިން ފެށިގެން އަމިއްލަ ޚަރަދުގައި ބޭސްފަރުވާއަށް ރާއްޖެއިން ބޭރަށް ފުރާ ފަރާތްތަކަށް 1000 އެމެރިކާ ޑޮލަރު ލިބޭނެ އިންތިޒާމް ހަމަޖައްސަވަން ކަމާބެހޭ އިދާރާތަކަށް އަންގަވައިފި ކަމުގައި ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މުޢިއްޒު މިކަން އިއުލާނު ކުރެއްވީ ސޯޝަލްމީޑިއާގައި ކުރެއްވި ޕޯސްޓެއްގައެވެ. 

އަމިއްލަ ޚަރަދުގައި ބޭސްފަރުވާއަށް ފުރާ ފަރާތްތަކުގެ އިތުރުން އެންސްޕާގެ އެހީތެރިކަމާއެކު ބޭސްފަރުވާއަށް ރާއްޖެއިން ބޭރަށް ފުރާ ފަރާތްތަކަށް 2000 ޑޮލަރު ލިބޭނެ އިންތިޒާމު ހަމަޖެއްސުމަށް އަންގާވާފައިވާނެ ކަމަށް ރައީސްގެ ޕޯސްޓުގައި އިތުރަށް ފާހަގަކުރެއްވިއެވެ.

ރާއްޖެއިން ބޭރަށް ބޭސް ފަރުވާއަށްދާ ފަރާތްތަކަށް ޑޮލަރު ހޯދުމުގައި ލުއިފަސޭހަކޮށް ދިނުމުގެ ގޮތުން، މިހާރުވެސް އާސަންދަ ޕޭޝަންޓުންނަށް ބޭންކު މެދުވެރިކޮށް 2000 ޑޮލަރާ ހަމައަށް ލިބޭ ފަދައިން، 1 އޮގަސްޓު 2025 އިން ފެށިގެން އެންސްޕާ ޕޭޝަންޓުންނަށްވެސް ބޭންކުތަކުން 2000 ޑޮލަރާ… — Dr Mohamed Muizzu (@MMuizzu) July 21, 2025

ސަރުކާރަށް އެއް އަހަރު ފުރުން ފާހަގަކުރުމަށް ބޭއްވި ހަފްލާގައި ރައީސް ވަނީ މިކަން މިގޮތަށް ކުރައްވާނެކަމުގެ އިޝާރާތެއް ދެއްވާފައެވެ. 

ރާއްޖޭގައި ފަތުރުވެރިކަމުގެ ވިޔަފާރިކުރާ ފަރާތްތަކުން ވަކި އަދަދަކަށް ޑޮލަރު މާރުކުރަން މަޖުބޫރު ކުރުވީ ރައްޔިތުންގެ ހައްޤުގައި ކަމުގައި ވިދާޅުވަމުން އެދުވަހު ރައީސް ވަނީ ރައްޔިތުންނަށް ލިބޭ ޑޮލަރުގެ މިންވަރު އިތުރުކޮށްދެއްވާނެކަމަށް ވަޢުދު ވެލައްވާފައެވެ.

މި ބަދަލުގެ ސަބަބުން ރައްޔިތުން އެކި ސިއްކީ އެކި ބޭނުންތަކުގައި ރާއްޖެއިން ބޭރަށް ކުރާ ދަތުރުފަތުރުގެ ކަންކަން  ފަސޭހަ ވެގެންދާނެއެވެ.