ޝުޖާއުގެ ގޮނޑި ގެއްލުވާލި މައްސަލާގައި އެމްޑީޕީއިން ކޯޓަށް ދަނީ
ވ. ތިނަދޫ ކައުންސިލްގެ ރައީސް ޝުޖާއު އަލީ މަގާމުން ވަކިވެފައިވާ ކަމަށް ލޯކަލް ގަވަމަންޓް އޮތޯރިޓީ (އެލްޖީއޭ) އިން ނިންމި މައްސަލަ ކޯޓަށް ހުށަހެޅުމަށް އިދިކޮޅު އެމްޑީޕީން ނިންމައިފިއެވެ.
މި މައްސަލައިގައި ކޯޓަށް ދާން ނިންމިކަން އިއުލާނު ކުރެއްވީ އެމްޑީޕީގެ ޗެއާޕާސަން ރައީސް މުހައްމަދު ނަޝީދުއެވެ.
މިއަދު އެމްޑީޕީގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ރައީސް ނަޝީދު ވިދާޅުވީ، ތިނަދޫ ކައުންސިލަރު ވަކިކުރުމުގެ މައްސަލަ މި ހަފުތާގެ ތެރޭގައި ކޯޓަށް ހުށަހަޅާނެ ކަމަށެވެ.
"ތިނަދޫގެ ކައުންސިލަރު ވަކި ކުރުމުގެ މައްސަލަ އަޅުގަނޑުމެން މި ހަފުތާގެ ތެރޭގައި ކޯޓަށް ހުށަހަޅާނަން. މިހާރު ޕާޓީގެ ގާނޫނީ ޓީމުން އެ މަސައްކަތް ކުރަމުންދަނީ،" ރައީސް ނަޝީދު ވިދާޅުވިއެވެ. ޝުޖާއު މަގާމުން ވަކިވެފައިވާ ކަމަށް އެލްޖީއޭއިން ނިންމީ، އޭނާ އިންތިހާބުވި ޕާޓީ ނޫން އެހެން ޕާޓީއަކަށް ސޮއިކުރި ކަމަށް ބުނެއެވެ.
އެލްޖީއޭއިން ނެރުނު ނޫސްބަޔާނެއްގައި ބުނެފައިވަނީ، މި އަހަރު ބޭއްވި ލޯކަލް ކައުންސިލް އިންތިހާބަށްފަހު، ޝުޖާއު އިންތިހާބުވި ޕާޓީ ނޫން އެހެން ޕާޓީއެއްގައި މެއި 19 ގައި ދަފުތަރުވެފައިވާކަން އިލެކްޝަންސް ކޮމިޝަނުން އަންގާފައިވާ ކަމަށެވެ. އެހެންކަމުން، ޖޫން 30، 2026 ގައި ބޭއްވި އެލްޖީއޭގެ ބޯޑު ބައްދަލުވުމުން ވަނީ ޝުޖާއުގެ މަގާމު ހުސްވެއްޖެކަން އިލެކްޝަންސް ކޮމިޝަނަށް އެންގުމަށް ނިންމާފައެވެ.
ޝުޖާއު ލޯކަލް ކައުންސިލް އިންތިހާބުގައި ވާދަކުރެއްވީ ދަ ޑިމޮކްރެޓްސްގެ ޓިކެޓުގައެވެ. ނަމަވެސް، ގާނޫނީ ގޮތުން ލާޒިމުކުރާ އަދަދަށް މެންބަރުން ނެތުމުގެ ސަބަބުން، ދަ ޑިމޮކްރެޓްސް އުވައިލިކަން އޭޕްރިލް 11، 2026 ގައި އިލެކްޝަންސް ކޮމިޝަނުން އޮތީ އަންގާފައެވެ. ޝުޖާއު އެމްޑީޕީއާ ގުޅުނީ ޕާޓީ އުވާލިކަން އެންގުމާ ގުޅިގެންނެވެ.
މިކަމާ ގުޅިގެން ޝުޖާއު ވިދާޅުވީ، ޕާޓީއެއް އުވާލުމާ ގުޅިގެން އެހެން ޕާޓީއަކާ ގުޅުމަކީ ކައުންސިލްގެ ގޮނޑި ގެއްލެންޖެހޭނެ ސަބަބެއް ކަމަށް ގަބޫލު ނުކުރައްވާ ކަމަށެވެ. "ޕާޓީއެއް އުވާލުމާ ގުޅިގެން އެހެން ޕާޓީއަކާ ގުޅުމަކީ ކައުންސިލްގެ ގޮނޑި ގެއްލެންޖެހޭނެ ސަބަބެއް ކަމަށް ގަބޫލެއް ނުކުރަން،" ކުރިން ވ. އަތޮޅު ކައުންސިލްގެ ރައީސްކަން ވެސް ކުރެއްވި ޝުޖާއު ވިދާޅުވިއެވެ.
މި މައްސަލައިގައި ގާނޫނީ ގޮތުން ގޮތެއް ނިންމުމަށް އެމްޑީޕީގެ ގާނޫނީ ޓީމުން މިހާރު އަންނަނީ ކޯޓަށް ހުށަހަޅާނެ ލިޔެކިޔުންތައް ތައްޔާރުކުރަމުންނެވެ.
ރިއެކްޓް