ހިލޭސާބަހަށް ލޭ ދިނުމަށް މީހުން ހޭލުންތެރިކުރުމަށް ސާޖިދާ ގޮވާލައްވައިފި

ގަވާއިދުން އަދި ހިލޭސާބަހަށް ލޭ ހަދިޔާކުރުމުގައި ހިއްސާވާ މަސްއޫލިއްޔަތަށް މުޖުތަމައު ހޭލުންތެރިކުރުމުގެ މަސައްކަތް ކުރިއަށް ގެންދިއުމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ގޮވާލައްވައިފިއެވެ.

އެކަމަނާ މިކަމަށް ގޮވާލެއްވީ ބައިނަލްއަޤްވާމީ ގޮތުން ފާހަގަކުރާ ލޭ ހަދިޔާ ކުރާ ފަރާތްތަކުގެ ދުވަހުގެ މުނާސަބަތުގައި އެކްސް ގައި ހިއްސާކުރެއްވި ޕޯސްޓެއްގައެވެ.

ސާޖިދާ ވިދާޅުވީ، ދިރިއުޅުމުގެ އެންމެ އުނދަގޫ ވަގުތުތަކުގައި ބަލިމީހުންނާއި އާއިލާތަކަށް އުއްމީދު ގެނެސްދޭ އަމިއްލަ އެދުން ކުޑަ އަމަލެއްގެ ގޮތުގައި ލޭ ހަދިޔާކުރާ މީހުންގެ އޯގާތެރިކަމާއި ދީލަތިކަން ފާހަގަކުރައްވާ ކަމަށެވެ. އަދި ލޭ ހަދިޔާގެ ކޮންމެ އަމަލެއްގެ ފަހަތުގައި އޮތީ އޯގާތެރިކަމުގެ ވާހަކައެއް އަދި އިންސާނިއްޔަތުގެ އަމަލެއް ކަމަށް އެކަމަނާ ވިދާޅުވިއެވެ.

ޚާއްޞަ ފަރުވާގައި ތިބޭ ބަލިމީހުންނާއި އެމީހުންގެ އާއިލާތަކަށް ލޭ ހަދިޔާކުރާ ފަރާތްތަކުގެ އެހީތެރިކަމަކީ ބިރުވެރިކަމުގެ ތެރެއިން އުއްމީދު ގެނުވައިދޭ ކަމެއްކަން ފާހަގަކުރައްވަމުން ސާޖިދާ ވިދާޅުވީ، ފުރާނަ ސަލާމަތް ކުރުމަށްޓަކައި އަބަދުވެސް ބޮޑެތި އަމަލުތަކެއް ކުރަން ނުޖެހޭ ކަމަށެވެ. ބައެއް ފަހަރު އާދައިގެ އޯގާތެރި އަމަލަކުން ވެސް މީހެއްގެ ދިރިއުޅުމަށް ބޮޑު ބަދަލެއް އައިސްދާނެ ކަމަށް އެކަމަނާ ވިދާޅުވިއެވެ.

"މި ދުވަސް ހަނދާންކޮށްދެނީ ފުރާނަ ސަލާމަތް ކުރުމަށް ޓަކައި ބޮޑު އަމަލެއް ކުރަން ނުޖެހޭ ކަން. ބައެއް ފަހަރު، އާދައިގެ އޯގާތެރިކަމުގެ އަމަލަކުން މީހެއްގެ ދިރިއުޅުމަށް ބޮޑު ބަދަލެއް އައިސްދާނެ. ގަވާއިދުން އަދި ހިލޭސާބަހަށް ލޭ ހަދިޔާކުރުމުގެ ހިއްސާވާ މަސްއޫލިއްޔަތަށް ހޭލުންތެރިކުރުމުގެ މަސައްކަތް ކުރިއަށް ގެންދަމާ ހިނގާ،" ސާޖިދާ ވިދާޅުވިއެވެ.

ކޮންމެ އަހަރެއްގެ ޖޫން މަހުގެ 14 ވަނަ ދުވަހަކީ ބައިނަލްއަޤްވާމީ ލޭ ހަދިޔާކުރާ މީހުންގެ ދުވަހުގެ ގޮތުގައި ފާހަގަކުރާ ދުވަހެވެ. މި ދުވަހުގެ މައިގަނޑު މަގުސަދަކީ ލޭ ހަދިޔާކުރުމުގެ މުހިންމުކަމާ ގުޅޭގޮތުން އާންމުން ހޭލުންތެރިކޮށް، ރައްކާތެރި ލޭގެ ފޯރުކޮށްދިނުމުގެ ނިޒާމު ހަރުދަނާކުރުމެވެ.