އީރާނަށް އަލުން ހަމަލާދިނުމަށް އެމެރިކާއާއި އިޒުރޭލުން ތައްޔާރުވަނީ 

އީރާނަށް އަލުން ހަމަލާދިނުމަށް އެމެރިކާއާއި އިޒުރޭލުން ތައްޔާރުވަނީ މި ހަފުތާގެ ތެރޭގައި އީރާނަށް އަމާޒުކޮށް ވަރުގަދަ ހަމަލާތަކެއް ދިނުމަށް އެމެރިކާއާއި އިޒުރޭލުން ތައްޔާރުވަމުންދާ ކަމަށް ނިއުޔޯކް ޓައިމްސް އިން ރިޕޯޓުކޮށްފިއެވެ. މި ރިޕޯޓާ ގުޅިގެން މެދުއިރުމަތީގެ މަސްރަހު ވަނީ ނުހަނު ބޮޑަށް ނުތަނަވަސްވެފައެވެ.

ނިއުޔޯކް ޓައިމްސްއިން ހާމަކޮށްފައިވާ ގޮތުގައި، ދެ ގައުމުގެ އަސްކަރީ ބާރުތަކުން ދަނީ މި ހަފުތާގެ ތެރޭގައި އީރާނަށް ދޭނެ ހަމަލާތަކުގެ އެންމެ ފަހުގެ ތައްޔާރީތައް ވަމުންނެވެ. މިއީ ސަރަހައްދީ ގޮތުންނާއި ބައިނަލްއަގުވާމީ ގޮތުން ބޮޑެތި ބަދަލުތަކެއް އަތުވެދާނެ ކަމެއް ކަމަށް މަސްރަހު ދިރާސާކުރާ ފަރާތްތަކުން ދަނީ ބުނަމުންނެވެ.

ހަނގުރާމައިގެ ބިރު ބޮޑުވެފައިވާ މި ދަނޑިވަޅުގައި، އީރާނުގެ ރިވޮލިއުޝަނަރީ ގާޑްސް އިން ވަނީ "އެމެރިކާ-ޒަޔަނިސްޓް ދުޝްމަނުންގެ ހަމަލާތަކާ ކުރިމަތިލުމަށް ހަނގުރާމައިގެ ގާބިލްކަން އިތުރުކުރުމުގެ" ހާއްސަ ތަމްރީނުތަކެއް ތެހެރާންގައި ބާއްވާފައެވެ. މިކަން އެ ގައުމުގެ ދައުލަތުގެ މީޑިއާއިން ވަނީ ކަށަވަރުކޮށްދީފައެވެ.

އީރާނުން ބާއްވާފައިވާ މި ތަމްރީނުތަކަކީ ކުރިމަތިވެދާނެ ކޮންމެ ހަމަލާއަކަށް ފުރިހަމައަށް ތައްޔާރުވެ އޮތުމުގެ ގޮތުން ކުރިއަށްގެންދިޔަ ހަރަކާތްތަކެއް ކަމަށް އެ ގައުމުން ބުނެއެވެ. މީގެ އިތުރުން، އީރާނުގެ އަސްކަރިއްޔާއިން ވަނީ އެ ގައުމުގެ ދިފާއީ ނިޒާމުތައް ވަރުގަދަކޮށް، ރައްދު ހަމަލާ ދިނުމަށް ތައްޔާރަށް އޮތްކަން ހާމަކޮށްފައެވެ.

އެމެރިކާއާއި އިޒުރޭލުގެ މި ތައްޔާރީތަކާ ގުޅޭގޮތުން އެ ދެ ގައުމުގެ ރަސްމީ އިދާރާއަކުން އަދި ވަކި އެއްޗެއް ހާމަކޮށްފައެއް ނުވެއެވެ. ނަމަވެސް، ނިއުޔޯކް ޓައިމްސްގެ ރިޕޯޓާއި އީރާނުގެ އަސްކަރީ ތަމްރީނުތަކަށް ބަލާއިރު، މި ހަފުތާއަކީ މެދުއިރުމަތީގެ މަސްރަހަށް ވަރަށް ނާޒުކު ހަފުތާއަކަށް ވެގެންދާނެ ކަމަށް ބެލެވެއެވެ.

ބައިނަލްއަގުވާމީ މުޖުތަމައުން ދަނީ މި ހާލަތު ވަރަށް ގާތުން ބަލަމުންނެވެ. ގިނަ ގައުމުތަކަކުން ދަނީ ހަމަނުޖެހުންތަކުން ދުރުހެލިވެ، މަސްރަހު ފިނިކުރުމަށްޓަކައި މަޝްވަރާގެ މަގު އިހުތިޔާރު ކުރުމަށް ގޮވާލަމުންނެވެ.