ޝަހުޒާންއާއި ލީވާން ޖަލަށްލި މައްސަލަ އދ.ގެ ހިއުމަން ރައިޓްސް ކަމިޝަނަރުގެ އޮފީހަށް

އދ.ގެ ހިއުމަން ރައިޓްސް ކައުންސިލަށް ހުށަހެޅި މައްސަލައިގައި ފާހަގަކޮށްފައިވާ ގޮތުގައި، މި ނޫސްވެރިންނާ މެދު ފިޔަވަޅު އަޅާފައިވަނީ އަދަދު އޮންލައިންއިން ތައްޔާރުކުރި ޑޮކިއުމަންޓްރީއާ ގުޅިގެންނެވެ. މި މައްސަލަ ފެށިފައިވަނީ މާޗް 28، 2026 ގައި އެ ޑޮކިއުމަންޓްރީ އާންމުކުރުމާ ގުޅިގެންނެވެ.

މި މައްސަލައިގައި ފުލުހުން ވަނީ އޭޕްރިލް 28 ގައި އަދަދު ނިއުސްރޫމަށް ވަދެ، ނޫސްވެރިންގެ ލެޕްޓޮޕްތަކާއި ސްޓޯރޭޖް ޑިވައިސްތައް ހިފަހައްޓާފައެވެ. އަދި މެއި 10، 2026 ގައި ކްރިމިނަލް ކޯޓުން ވަނީ އެ ޑޮކިއުމަންޓްރީއާ ގުޅޭ އެއްވެސް ވާހަކައެއް ދެއްކުން މަނާކޮށް، "ގޭގް އޯޑަރެއް" ނެރެފައެވެ.

ނޫސްވެރިޔާ މުހައްމަދު ޝަހުޒާން ހައްޔަރުކޮށްފައިވަނީ މެއި 11 ވަނަ ދުވަހު ބޭއްވި ރިޔާސީ ނޫސްވެރިންގެ ބައްދަލުވުމެއްގައި، ޑޮކިއުމަންޓްރީގައިވާ ތުހުމަތުތަކާ ގުޅޭގޮތުން ރައީސަށް ސުވާލު ދެންނެވުމުންނެވެ. އެ ސުވާލާ ގުޅިގެން އޭނާ 15 ދުވަހަށް ޖަލަށްލައި 25,000 ރުފިޔާއިން ޖޫރިމަނާކުރިއެވެ. ނޫސްވެރިޔާ ލީވާން އަލީ ނަސީރު ޖަލަށްލާފައިވަނީ ކޯޓު އަމުރާ ގުޅޭގޮތުން ލިޔުނު ރިޕޯޓަކާ ގުޅިގެން 10 ދުވަހުގެ މުއްދަތަށެވެ.

އދ. އަށް ހުށަހެޅި މައްސަލައިގައި ބުނެފައިވަނީ، މި ނޫސްވެރިންނަށް ގާނޫނީ ވަކީލަކު އައްޔަންކުރުމަށް ދީފައިވަނީ އެންމެ ދެ ގަޑިއިރު ކަމަށްވާތީ، މިއީ އިންސާފުވެރި ޝަރީއަތެއްގެ ހައްގުން މަހުރޫމްކުރުން ކަމަށެވެ. މިއީ ބައިނަލްއަގުވާމީ އިންސާނީ ހައްގުތަކާ ބެހޭ މުއާހަދާގެ 19 ވަނަ މާއްދާއާ ހިލާފަށް، ހިޔާލުފާޅުކުރުމުގެ މިނިވަންކަމަށް ހުރަސްއެޅުމަށް ހިންގާފައިވާ އަމަލެއް ކަމަށްވެސް ބަޔާންކޮށްފައިވެއެވެ.

މި މައްސަލަ މިހާރު ހައިކޯޓުގައި އިސްތިއުނާފުކޮށްފައިވީ ނަމަވެސް، ޝަރުއީ ދާއިރާއަށް އޮތް ސިޔާސީ ނުފޫޒުގެ ސަބަބުން އިންސާފު ލިބޭނެ ކަމުގެ ޔަގީންކަން ނެތް ކަމަށް އދ. އަށް ހުށަހެޅި ލިޔުމުގައިވެއެވެ. އެހެންކަމުން، ދައުލަތް ޖަވާބުދާރީ ކުރުވުމަށް މަސައްކަތްކުރާ މި ދެ ނޫސްވެރިން ވަގުތުން މިނިވަންކުރުމަށް ބައިނަލްއަގުވާމީ މުޖުތަމައުގެ އެހީތެރިކަމަށް ވަނީ އެދިފައެވެ.