މުއިއްޒުގެ 'ޑިކްޓޭޓަރު' ކަމުގައި ހައްގުތަކަށް ކުރާ މަސައްކަތް މި ދިޔައީ ބައި ގަރުނު ފަހަތަށް: ފައްޔާޒް

ރައީސް ޑރ. މުހައްމަދު މުއިއްޒުގެ ވެރިކަމުގައި ރާއްޖޭގެ އަސާސީ ހައްގުތަކަށްޓަކައި ކުރަމުންދާ މަސައްކަތް ބައި ގަރުނަށްވުރެ ފަހަތަށް ގޮސްފައިވާ ކަމަށް އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް ވިދާޅުވެއްޖެއެވެ.

ފައްޔާޒް މިހެން ވިދާޅުވީ 'އަދަދު' ނޫހުގެ ދެ ނޫސްވެރިއަކަށް ކްރިމިނަލް ކޯޓުން މިރޭ ޖަލު ހުކުމެއް އިއްވުމާ ގުޅިގެން އެކަމުގެ ކަންބޮޑުވުން ފާޅުކުރައްވައި އެކްސްގައި ކުރެއްވި ޕޯސްޓެއްގައެވެ.

ފައްޔާޒް ވިދާޅުވީ ހިޔާލުފާޅުކުރުމުގެ މިނިވަންކަމަށް ކުޑަވެސް އިހުތިރާމެއް ކުރާކަމަށް ދެއްކުމަށް ރައީސް ކުރައްވަމުން ގެންދެވި މަސައްކަތް މިހާރު ދޫކޮށްލައްވާފައިވާ ކަމަށެވެ. އަދި އެއްވެސް ޝަރީއަތަކާ ނުވަތަ ގާނޫނީ ތަހުގީގަކާ ނުލައި، ކޯޓުތަކުން ވަނީ ވަކި ޑޮކިއުމެންޓްރީއަކާ ގުޅޭ އެއްވެސް ވާހަކައެއް ނުދެއްކޭ ގޮތަށް ގާނޫނުއަސާސީއާ ހިލާފު "ގެގް އޯޑަރެއް" ނެރެފައިވާ ކަމަށްވެސް އޭނާ ފާހަގަކުރެއްވިއެވެ.

ނޫސްވެރިން ކަމަށްވާ މުހައްމަދު ޝަހުޒާން އާއި ލީވާން އަލީ ނާސިރުގެ މައްޗަށް ކޯޓުގެ ހުރުމަތް ކެނޑިކަމުގެ ދައުވާ އުފުލައި، ސިއްރު އަޑުއެހުންތަކެއްގައި ލީވާން އަލީ ނާސިރު އަށް 10 ދުވަހާއި މުހައްމަދު ޝަހުޒާން އަށް 15 ދުވަހުގެ ޖަލު ހުކުމެއް އިއްވާފައިވަނީ އެއްވެސް ގާނޫނީ އަސާސެއް ނެތި ކަމަށް ފައްޔާޒް ތުހުމަތު ކުރެއްވިއެވެ. އޭނާ މި ޝަރީއަތްތައް ސިފަކުރެއްވީ "ކެންގަރޫ ކޯޓު" ތަކުން ހިންގި "ފޭކު" ޝަރީއަތްތަކެއްގެ ގޮތުގައެވެ.

ފައްޔާޒް އިތުރަށް ވިދާޅުވީ "މި ފޭކު ޝަރީއަތްތަކުން ހާމަވަނީ، ނޫސްވެރިންނަށް ގޯނާކޮށް ބިރުދެއްކުމުން އެކަނި ރައީސް މިހާރު ފުދިވަޑައިނުގަންނަވާ ކަމާއި، އަމިއްލަ އަދި ސިޔާސީ އިދިކޮޅު ފަރާތްތަކަށް އަނިޔާވެރިވުމަށް ދައުލަތުގެ މުޅި ބާރު ނަހަމަގޮތުގައި ބޭނުންކުރެއްވުމަށް އެމަނިކުފާނު ތައްޔާރަށް ހުންނެވި ކަމެވެ." މިއީ ގައުމުގެ ތާރީހުގައި ބިރުވެރި އާ ދުވަސްތަކަކާ ކުރިމަތިލާންޖެހުން ކަމަށްވެސް އޭނާ ސިފަކުރެއްވިއެވެ.

ހިޔާލުފާޅުކުރުމުގެ މިނިވަންކަމަކީ މި ސަރުކާރަށް މަޖަލަކަށް ވެދާނެ ކަމަށާއި، ނަމަވެސް މި ހައްގުތައް ނިގުޅައިގަތުން ހުއްޓުވުމަށް ކުރެވެން އޮތް ހުރިހާ މަސައްކަތެއް ކުރާނެ ކަމުގެ ޔަގީންކަން ފައްޔާޒް ދެއްވިއެވެ. އަދި ގައުމުގެ ހުރިހާ ރައްޔިތުން ވެސް މި އައިރު ގާނޫނީ ނިންމުންތަކަށް ނޫނެކޭ ބުނެ، ކުރެވެން އޮތް ކޮންމެ ގޮތަކުން އިހުތިޖާޖު ކުރުމަށް އޭނާ ވަނީ ގޮވާލައްވާފައެވެ.