ރިފަރެންޑަމްގެ މަރުހަލާތައް ކުރިއަށް ގެންގޮސްފައިވަނީ ގާނޫނާ ހިލާފަށް: ޝުނާނާ
ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ދުވަހެއްގައި ބޭއްވުމާ ގުޅޭގޮތުން ނަގަން ނިންމާފައިވާ ފެންނަ ނުފެންނަ ވޯޓު ނުވަތަ ރިފަރެންޑަމްގެ މަރުހަލާތައް ކުރިއަށް ގެންގޮސްފައިވަނީ ގާނޫނާ ހިލާފަށް ކަމަށް ބުނެ، އެ މައްސަލަ ހައިކޯޓަށް ހުށަހެޅުއްވި ސަބަބުތައް ގާނޫނީ ވަކީލު މަރިޔަމް ޝުނާނާ ތަފްސީލުކޮށްދެއްވައިފިއެވެ.
ޝުނާނާ ވިދާޅުވި ގޮތުގައި މި މައްސަލަ ހުށަހެޅީ ރެފެރަންޑަމް ކުރިއަށްގެންދާ ގޮތުގައި ހުރި ގާނޫނީ ނުކުތާތަކާއި، އިންސާފުވެރިކަމެއް ނެތުމުގެ ސަބަބުންނެވެ. އެގޮތުން 16 ފެބުރުވަރީ 2026 ގައި ރައީސުލްޖުމްހޫރިއްޔާ އިލެކްޝަންސް ކޮމިޝަން (އީސީ) އަށް ރެފެރަންޑަމް ބޭއްވުމަށް ހުށަހަޅުއްވައި، ތާރީޚަކީ 4 އޭޕްރީލް 2026 ކަމަށް ކަނޑައެޅުއްވި ދުވަހު، އީސީން އެ ތާރީޚު އިއުލާނުކޮށްފައިވާކަން އޭނާ ފާހަގަކުރެއްވިއެވެ. ނަމަވެސް އެކަމާ މެދު ގޮތެއް ނިންމުމަށް ކޮމިޝަނުން ބައްދަލުވުމެއް ބާއްވާފައިވަނީ އޭގެ އަނެއް ދުވަހު ކަމަށް ޝުނާނާ ވިދާޅުވިއެވެ.
ގާނޫނުއަސާސީގެ 167 ވަނަ މާއްދާއާއި 170 ވަނަ މާއްދާގެ އިތުރުން ރެފެރަންޑަމް ގާނޫނާ ހަވާލާދީ ޝުނާނާ ވިދާޅުވީ، އީސީން ވޯޓުލާނެ ތާރީޚެއް ކަނޑައަޅަންވާނީ ހުށަހެޅުމާ މެދު ފުންކޮށް ވިސްނައި، އިންސާފުވެރި ވޯޓެއް ބޭއްވޭނެކަން ކަށަވަރު ކުރުމަށްފަހުގައެވެ. "އީސީން މިކަމުގައި އަމަލުކޮށްފައިވަނީ ހުށަހެޅުމަކީ އަމުރެއްގެ ގޮތުގައި ބަލައިގެން،" ކަމަށާއި މީގެ ސަބަބުން ރައްޔިތުންގެ ވޯޓުލުމުގެ ހައްގާއި ދައުލަތުގެ ކަންކަމުގައި މާނަހުރި ގޮތެއްގައި ބައިވެރިވުމުގެ ހައްގަށް އުނިކަން އައިސްފައިވާ ކަމަށް އޭނާ ވިދާޅުވިއެވެ.
މި މައްސަލައިގެ އިތުރުން، ކެންދޫ ދާއިރާގެ ކުރީގެ މެންބަރު އަލީ ހުސައިން ވެސް ވަނީ ރައީސް އޮފީހަށް ރައްދުވާ ގޮތަށް ދުސްތޫރީ މައްސަލައެއް ހުށަހަޅުއްވާފައެވެ. އޭނާ އެދިވަޑައިގެންފައިވަނީ ގާނޫނުއަސާސީއަށް ގެނައި 8 ވަނަ އިސްލާހަކީ ބާތިލު އެއްޗެއް ކަމަށް ކަނޑައަޅައި، މި ރެފެރަންޑަމަކީ ގާނޫނުއަސާސީގެ 264 ވަނަ މާއްދާއާ ހިލާފު ކަމެއް ކަމަށް ކަނޑައަޅައިދިނުމަށެވެ. ނަމަވެސް އެ މައްސަލަ ކޯޓުން ވަނީ ބޭރުކޮށްލާފައެވެ.
މި ހުރިހާ ގާނޫނީ ގޮންޖެހުންތަކެއް ހުރި ނަމަވެސް، ސުޕްރީމް ކޯޓުން 31 މާރިޗު 2026 ގައި ނިންމާފައިވަނީ އަންނަ އޭޕްރީލް 4 ގައި ބޭއްވުމަށް ހަމަޖެހިފައިވާ ރެފެރަންޑަމް ހުއްޓުވަންޖެހޭ އެއްވެސް ގާނޫނީ ސަބަބެއް ނެތް ކަމަށެވެ.
ރިއެކްޓް