އޭޕްރިލް މަހު ދައްކަންޖެހޭ 500 މިލިއަން ޑޮލަރުގެ ސުކޫކަށް ފައިސާއެއް ނެތް: ޔާމީން
2026 ވަނަ އަހަރުގެ އޭޕްރިލް މަހު އަނބުރާ ދައްކަންޖެހޭ ސުކޫކަށް ފައިސާ ދެއްކުމުގެ ގާބިލުކަން ރާއްޖޭގައި ނެތްކަމަށް ވިދާޅުވެ، ކުރީގެ ރައީސް އަބްދުﷲ ޔާމީން އަބްދުލްގައްޔޫމް އިންޒާރު ދެއްވައިފި އެވެ.
މާލޭގައި ބޭއްވި ޕީޕަލްސް ނޭޝަނަލް ފްރަންޓް (ޕީއެންއެފް) ގެ "ޗަގޯސް" ޖަލްސާއެއްގައި ވާހަކަދައްކަވަމުން ޔާމީން ވިދާޅުވީ، ސަރުކާރުން ދެމުންދާ ޔަގީންކަންތަކަކީ ދުނިޔޭގެ އަދި ރާއްޖޭގެ މާލީ ހާލަތު އޮތް ގޮތާ ދިމާވާ ވާހަކަތަކެއް ނޫން ކަމަށެވެ.
"ދުނިޔެ މިއޮތީ ވަރަށް ބޮޑު ކާރިސާއެއްގެ ތެރޭގައި، އެކަމަކު މުއިއްޒު ވިދާޅުވަނީ ހުރިހާ ކަމެއްވެސް ރަނގަޅޭ. ކައުންސިލް އިންތިހާބަށްފަހު މި ރާގު ބަދަލުވާނެ،" ޔާމީން ވިދާޅުވި އެވެ.
"ސޮވެރިން ޑިވެލޮޕްމެންޓް ފަންޑުގަ 150 މިލިއަން ޑޮލަރު އިނީ. ދެން އެހީވާންތިބި މީހުންގެ އެވަރުގެ ރެޒިލިއަންސެއް ނެތް." އަސްލު އަދަދުގެ ގޮތުގައި ގާތްގަނޑަކަށް 500 މިލިއަން ޑޮލަރު ދައްކަންޖެހޭ މި ސުކޫކަކީ ރާއްޖެއިން ބޭރަށް ދައްކަންޖެހޭ އެންމެ ބޮޑު އެއް ދަރަންޏެވެ.
ޔާމީން ވަކާލާތު ކުރެއްވި ގޮތުގައި، ދުނިޔޭގެ މާލީ ފިއްތުންތައް އިތުރުވުމާއި ލޯނު ދޫކުރުމުގެ ޝަރުތުތައް ހަރުކަށިވުމުގެ ސަބަބުން، މި ދަރަނި އަދާކުރުމަށްޓަކައި ރީފައިނޭންސް ކުރުމަށް ނުވަތަ އާ ފަންޑިން ހޯދުމަށް ސަރުކާރަށް ދަތިތަކާ ކުރިމަތިވާނެ އެވެ.
ޔާމީންގެ މި ވާހަކަފުޅުތައް އައިސްފައިވަނީ ގައުމުގެ މާލީ ހާލަތާ މެދު ސިޔާސީ މަސްރަހު ހޫނުވެފައިވާ ދަނޑިވަޅެއްގަ އެވެ. ކުރީގެ ރައީސް ސިފަކުރެއްވި ގޮތުގައި މި ދަރަނި ދެއްކުމަކީ ސަރުކާރުގެ އިގްތިސާދީ މެނޭޖްމަންޓަށް ކުރިމަތިވާނެ އެންމެ ބޮޑު އިމްތިހާނެވެ. އަދި އިގްތިސާދާ މެދު ސަރުކާރުން މިހާރު ގެންގުޅޭ އުންމީދީ ރާގަކީ ކުރިއަށް އޮތް ލޯކަލް ކައުންސިލް އިންތިހާބަށް އަމާޒުކޮށްގެން ގެންގުޅޭ ރާގަކަށް ވެދާނެ ކަމަށާއި، އިންތިހާބަށްފަހު އެކަން ބަދަލުވެދާނެ ކަމަށްވެސް އެމަނިކުފާނު ވިދާޅުވި އެވެ.
ރިއެކްޓް