ދަރިފުޅަށް ދެ އަހަރު ފުރެންދެން މުވައްޒަފުންނަށް ހުސްވަގުތުދޭން ވަޒީފާއާ ބެހޭ ގާނޫނު އިސްލާހުކޮށްފި

ދަރިފުޅަށް ދެ އަހަރު ފުރެންދެން ބެލެނިވެރިންނަށް ކުދިން ބެލުމުގެ މެދުކެނޑުންތައް ނުވަތަ ހުސްވަގުތު ލިބޭ ގޮތަށް ވަޒީފާއާ ބެހޭ ގާނޫނަށް ހުށަހެޅި އިސްލާހު ރައްޔިތުންގެ މަޖިލީހުން މިއަދު ފާސްކޮށްފި އެވެ. 

މި ބިލް ފާސްވީ 62 މެންބަރުންގެ އިއްތިފާގުންނެވެ. މި އިސްލާހާ ދެކޮޅަށް އެއްވެސް މެންބަރަކު ވޯޓެއް ނުދެއްވަ އެވެ. މި އިސްލާހުގެ ދަށުން، ޝަރުތު ހަމަވާ މުވައްޒަފުންނަށް މަސައްކަތު ގަޑީގައި ކުދިން ބެލުމަށްޓަކައި ދުވާލަކު ދެ ފަހަރު، ކޮންމެ ފަހަރަކު 30 މިނެޓުގެ މެދުކެނޑުމެއް ލިބޭނެ އެވެ. މި މެދުކެނޑުންތަކަކީ މުސާރައިން އެއްވެސް އުނިކުރުމެއް ނެތި ލިބިދޭނެ ވަގުތުތަކެކެވެ. މީގެ ކުރިން މި އިނާޔަތް ލިބެމުން އައީ ދަރިފުޅަށް އެއް އަހަރު ފުރެންދެން ކަމަށްވީ ނަމަވެސް، އަލަށް ގެނައި އިސްލާހާއެކު މި މުއްދަތު ވަނީ އިތުރު އެއް އަހަރަށް ދިގުދަންމާލާފައެވެ.

މަޖިލިސް މެންބަރުން ވިދާޅުވި ގޮތުގައި، މި ބަދަލުގެ މަގްސަދަކީ ވަޒީފާ އަދާކުރާ ބެލެނިވެރިންނަށް، ހާއްސަކޮށް ވިހެއުމާ ގުޅިގެން ދޭ ޗުއްޓީއަށްފަހު އަލުން ވަޒީފާއަށް ނުކުންނަ މައިންނަށް އިތުރު އެހީތެރިކަން ފޯރުކޮށްދިނުމެވެ. އަދި މީގެ އިތުރުން، ކުއްޖާގެ ހަޔާތުގެ ފުރަތަމަ ދެ އަހަރު ދުވަހު އެކަށީގެންވާ އަޅާލުން ދިނުމަށާއި ގާތުން ކިރުދިނުމަށް ހިތްވަރު ދިނުންވެސް މީގެ މަގްސަދުތަކުގެ ތެރޭގައި ހިމެނެއެވެ.

މި އިސްލާހަށް އަމަލުކުރަން ފަށާނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު މި ބިލް ތަސްދީގުކުރައްވައި، ސަރުކާރުގެ ގެޒެޓުގައި ޝާއިއުކުރާ ދުވަހުން ފެށިގެންނެވެ.