ރާއްޖޭގެ ފުރަތަމަ އެއާ ޓްރެފިކް ކޮންޓްރޯލަރ މުޙައްމަދު ނައީމް ނިޔާވެއްޖެ
ދިވެހިރާއްޖޭގެ ފުރަތަމަ އެއާ ޓްރެފިކް ކޮންޓްރޯލާ، މުޙައްމަދު ނައީމު ހުސައިން އުމުރުފުޅުން 74 އަހަރުގައި ނިޔާވެއްޖެއެވެ.
އޭނާ ނިޔާވީ އާލާސްކަންފުޅާ އުޅުއްވާތާ ގިނަ ދުވަސްތަކެއް ވެފައިވަނިކޮށް، މިދިޔަ އާދިއްތަ ދުވަހުއެވެ. ނައީމްގެ ޖަނާޒާ ބާއްވާފައިވަނީ އިއްޔެ ހުޅުމާލޭ ސަހަރާގައެވެ.
ނައީމް ނިޔާވުމުގެ ހިތާމައިގައި މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އިން ވަނީ ތައުޒިޔާ ފޮނުވާފައެވެ. އެ ކުންފުނިން ބުނި ގޮތުގައި ނައީމްގެ ވަކިވެދިއުމަކީ ރާއްޖޭގެ މުޅި އޭވިއޭޝަން ދާއިރާއަށް ލިބުނު ފޫނުބެއްދޭނެ ވަރުގެ ބޮޑު ހުސްކަމެކެވެ. އަދި ރާއްޖޭގެ ސިވިލް އޭވިއޭޝަން ދާއިރާ ކުރިއެރުވުމަށް އޭނާ ކުރެއްވި މަސައްކަތާއި ފޯރުކޮށްދެއްވި ހިދުމަތްތައް އަބަދުވެސް ހަނދާން އާކުރާނީ އިހުތިރާމާއި ޝުކުރުވެރިކަމާ އެކުގައި ކަމަށް އެމްއޭސީއެލް އިން ބުނެފައިވެއެވެ.
We are deeply saddened to learn of the passing of Mr. Mohamed Naeem Hussain, the first Air Traffic Controller of the Maldives. His passing is a great loss to the aviation community, and he will be remembered with respect and gratitude for his contributions.
May Allah (SWT) grant… pic.twitter.com/wpgBIQWoes — Maldives Airports Company Ltd (@MACLmedia) January 13, 2026
މުޙައްމަދު ނައީމަކީ ރައީސް އިބްރާހީމް ނާސިރުގެ ވެރިކަމުގައި، މީގެ 59 އަހަރު ކުރިން ހުޅުލޭ އެއާޕޯޓް ހުޅުވުމަށްޓަކައި އެންމެ ފުރަތަމަ ތަމްރީނު ކުރި އެއާ ޓްރެފިކް ކޮންޓްރޯލަރުންގެ ތެރޭގައި ހިމެނޭ ބޭފުޅެކެވެ. އޭނާ ވަނީ ސްރީ ލަންކާއިން އެއާ ޓްރެފިކް ކޮންޓްރޯލް (އޭޓީސީ) ގެ ތަމްރީނުތައް ފުރިހަމަ ކުރައްވާފައެވެ.
ތަމްރީނުތަކަށްފަހު ހުޅުލޭ އެއާޕޯޓުގެ ފުރަތަމަ އެއާ ޓްރެފިކް ކޮންޓްރޯލަރުގެ ވަޒީފާއަށް ނައީމް ނުކުމެވަޑައިގަތީ އޭޕްރީލް 7، 1973 ގައެވެ. މީގެ އިތުރުން އޭނާ ވަނީ ތައިލެންޑުގެ ސިވިލް އޭވިއޭޝަން ސެންޓަރުން ވެސް އޭޓީސީގެ ތަމްރީނު ހައްދަވައި، އޮސްޓްރޭލިއާގައި އެއިރޯނޯޓިކަލް ސާޗު އެންޑް ރެސްކިއު ޓްރެއިނިން ވެސް ފުރިހަމަ ކުރައްވާފައެވެ.
ނައީމަކީ ރާއްޖޭގެ ވައިގެ ދަތުރުފަތުރުގެ ދާއިރާގެ ބިންގާ އެޅުމުގައި މުހިންމު ދައުރެއް އަދާކުރެއްވި، ދާއިރާގެ ތަޖުރިބާކާރު ބޭފުޅެކެވެ. އޭނާގެ ވަކިވެދިއުމަކީ ދާއިރާގެ ގިނަ ބަޔަކަށް ލިބުނު ފުން ހިތާމައެކެވެ.
ރިއެކްޓް