އެމްޑީޕީގެ ޗެއާޕާސަންގެ މަޤާމަށް މީކާއީލް ޝައުގުވެރިކަން ފާޅުކޮށްފި

ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު އަދި އެމްޑީޕީގެ އިސް އެކްޓިވިސްޓެއް ކަމަށްވާ މީކާއީލް ނަސީމް، އެމްޑީޕީގެ ޗެއާޕާސަންގެ މަޤާމަށް ވާދަކުރުމަށް ޝައުގުވެރިކަން ފާޅުކޮށްފިއެވެ.

މިކަން މީކާއީލް ހާމަކުރެއްވީ ސޯޝަލްމީޑިއާ މެދުވެރިކޮށެވެ. މީކާއީލްގެ މި ނިންމެވުމަކީ އެމްޑީޕީގެ ތެރޭގައި ކުރިއަށް އޮތް ދުވަސްތަކުގައި ސިޔާސީ ފޯރި އިތުރުވެގެންދާނެ ކަމުގެ ސިގްނަލެކެވެ.

މީކާއީލް ނަސީމް އޭނާގެ އެކްސް އެކައުންޓުން ކުރެއްވި ޕޯސްޓެއްގައި ވިދާޅުވެފައިވަނީ، އެމްޑީޕީގެ ޗެއާޕާސަންގެ މަޤާމަށް ވާދަކުރުމަށް ޝައުގުވެރިކަން ފާޅުކުރައްވާ ކަމަށާއި، ލީޑާޝިޕުން އާ ޖީލަކަށް ފުރުސަތު ހޯދުމުގެ މި މުހިންމު މަސައްކަތުގައި އެމްޑީޕީގެ އާންމު މެންބަރުންގެ އެއްބާރުލުމާއި ތާއީދަށް އެދިލައްވާ ކަމަށެވެ.
މީކާއީލް ނަސީމަކީ އެމްޑީޕީގެ ޓިކެޓުގައި ކުރިމަތިލައްވައި މަޖިލިސް ގޮނޑި ދެވަނަ ދައުރަކަށް ދިފާޢުކުރެއްވި ހަމައެކަނި މެންބަރެވެ.

އެމްޑީޕީ މިހާރު އޮތީ އިދިކޮޅު ޕާޓީގެ ގޮތުގައެވެ. ޕާޓީގެ އެތެރޭގެ އިންތިޚާބުތަކަކީ ޕާޓީގެ މުސްތަޤުބަލު ކަނޑައެޅުމުގައި މުހިންމު ދައުރެއް އަދާކުރާ ކަމެކެވެ.
މީކާއީލްގެ އިތުރުން ޗެއާޕާސަންގެ މަޤާމަށް ޝައުގުވެރިކަން ފާޅުކުރައްވާފައިވަނީ ކުރީގެ މަޖިލިސް ރައީސް އަސްލަމާއި ދިއްދޫ ދާއިރާގެ ކުރީގެ މެންބަރު އަބްދުﷲ ވަހީދު އެވެ. ރޭ ބޭއްވުނު އެމްޑީޕީގެ ފައުމީ މަޖިލިސް ޖަލްސާގައި ވައްޑެ ޗެއާޕާސަންގެ މަޤާމަށް ހޮވުމަށް ފާސްވީ ނަމަވެސް ޖަލްސާ ނިމިގެން ދިޔައީ އެކަން މުޅީން ނުނިމިއެވެ.