ފަތުރުވެރިކަމުން ނަގާ ޓީޖީއެސްޓީ 17 އިންސައްތައަށް ބޮޑުކޮށްފި

ރާއްޖޭގެ ފަތުރުވެރިކަމުގެ ދާއިރާއިން ނަގަމުން އަންނަ ޓީޖީއެސްޓީ އިއްޔެއިން ފެށިގެން 17 އިންސައްތައަށް ބޮޑުކޮށްފިއެވެ.

މިއީ މީގެ ކުރިން 16 އިންސައްތައިގައި ހުރި ޓެކްސް ރޭޓް އެއް އިންސައްތަ އިތުރުކޮށް ގެނެވުނު ބަދަލެކެވެ.

މި ބަދަލު ގެނައުމަށްޓަކައި ހުށަހެޅުނު ބިލު ރައީސުލްޖުމްހޫރިއްޔާ ތަސްދީގު ކުރެއްވީ 5 ނޮވެމްބަރު 2024 ގައެވެ. އަދި މި ބިލަށް އަމަލުކުރަން ފަށާނީ 2025 ވަނަ އަހަރުގެ ޖުލައި 1 ވަނަ ދުވަހުން ފެށިގެންކަމަށް އެ އިސްލާހުގައި ބުނެފައިވެއެވެ.

📢TGST Rate Change
Tourism sector businesses are advised to take necessary actions to implement system updates and display prices inclusive of the new 17% TGST rate. This proactive approach will ensure a smooth transition and continued compliance.
For detailed information:… pic.twitter.com/wskVAViX7h — Maldives Inland Revenue Authority (@MIRAmaldives) July 1, 2025

މީރާއިން ބުނި ގޮތުގައި މި ހިނގާދިޔަ މުއްދަތުގެ ތެރޭގައި ސިސްޓަމްތަކަށް ގެންނަންޖެހޭ ބަދަލުތައް ގެނައުމާއި، ޓޫރިޒަމް ދާއިރާގެ މުދަލާއި ޚިދުމަތުގެ އަގުތަކަށް އައު ރޭޓުތައް ތަންފީޒުކުރުމުގެ މަސައްކަތް ވަނީ ކުރެވިފައެވެ.

ރައީސް މުޢިއްޒުގެ ސަރުކާރުން ދަނީ ރާއްޖޭގެ އިގްތިސާދީ ހާލަތު ހަރުދަނާކުރުމަށްޓަކައި ޓެކްސް ބޭސް ފުޅާކުރުމުގެ މަސައްކަތް ކުރަމުންނެވެ. ނަމަވެސް ސަރުކާރުން ވަނީ ރައްޔިތުންގެ އަތުން އިތުރު ޓެކުހެއް ނުނަގާނެ ކަމަށާއި، ރައްޔިތުންނަށް ދަތިވާފަދަ އެއްވެސް ފިޔަވަޅެއް ނާޅާނެ ކަމުގެ ޔަގީންކަން ދީފައެވެ.

މި ގޮތުން ސަރުކާރުން ވަނީ ފަތުރުވެރިކަމުގެ ދާއިރާއިން ނަގާ ގްރީން ޓެކްސް އާއި އެއަރޕޯޓް ޑިވެލޮޕްމަންޓް ޗާޖު ބޮޑުކުރުމަށް ނިންމާފައެވެ. އަދި ހަމައެއާއެކު، ރާއްޖެއަށް ޒިޔާރަތްކުރާ ކޮންމެ ފަތުރުވެރިއެއްގެ ނިސްބަތުން ވަކި އަދަދެއް ނެގުމަށާއި، ބޭރު ފައިސާއާ ބެހޭ ގާނޫނުގެ ދަށުން ބޭރު ފައިސާއިން އާމްދަނީ ލިބޭ ފަރާތްތަކުން އެ އަދަދަށް ބޭންކަށް ބޭރުފައިސާ މާރުކުރުމަށް ލާޒިމުކޮށްފައިވެއެވެ.

ސަރުކާރުން ހާމަކުރާ ގޮތުގައި މި ގާނޫނަށް އަމަލުކުރަން ފެށުމާ ގުޅިގެން މިހާރު ވަނީ ގިނަ އަދަދެއްގެ ބޭރު ފައިސާ ބޭންކިންގ ސިސްޓަމަށް ވަންނަން ފަށާފައެވެ.