އަރަބިއްޔާ ސްކޫލުގެ މަސައްކަތް އަންނަ އަހަރުގެ ނޮވެންބަރަށް ނިމޭނެ: ވަޒީރު
އަރަބިއްޔާ ސްކޫލުގެ އަލަށް އަޅަމުންދާ އިމާރާތުގެ މަސައްކަތް 2025 ވަނަ އަހަރުގެ ނޮވެމްބަރު މަހަށް ނިންމާލެވޭނެ ކަމަށް ތައުލީމީ ވަޒީރު ޑރ. އިސްމާއިލް ޝަފީއު ވިދާޅުވެއްޖެއެވެ.
މިނިސްޓަރ ޝަފީއު ވިދާޅުވި ގޮތުގައި އަރަބިއްޔާ ސްކޫލްގެ އައު އިމާރާތަކީ މާލޭގައި މިހާތަނަށް ނުދެކޭ ފެންވަރުގެ ޒަމާނީ ވަސީލަތްތަކާއެކު ތަރައްގީކުރެވޭ ސްކޫލެކެވެ. އަދި މާލޭގައި ފުރަތަމަ ފަހަރަށް ސްކޫލެއްގައި އަންޑަރ ގްރައުންޑް ޕާކިން ހިމެނޭނެ ކަމަށް ވެސް އެމަނިކުފާނު ފާހަގަކުރެއްވިއެވެ.
މާފަންނު ސްޓޭޑިއަމް ކައިރީގައި ހުންނަ 386 ކޮށީގައި އަޅަމުންދާ މި ސްކޫލަކީ އަށް ބުރީގެ ޒަމާނީ އިމާރާތެއް ކަމަށްވާއިރު، މި މަޝްރޫއުގެ މަސައްކަތް ހަވާލުކޮށްފައިވަނީ ރަޝީދު ކާޕެންޓްރީ އެންޑް ކޮންސްޓްރަކްޝަން ޕްރައިވެޓް ލިމިޓެޑް (އާރްސީސީ) އާއެވެ.
އިމާރާތުގެ އަންޑަރ ގްރައުންޑް ޕާކިންގައި 200 އަށްވުރެ ގިނަ ސައިކަލާއި ކާރު ޕާކްކުރެވޭނެ ކަމަށް ވަޒީރު ވިދާޅުވިއެވެ. މިއީ ސްކޫލުގެ މުވައްޒަފުންނާއި ބެލެނިވެރިންނަށް ލިބިގެންދާނެ ވަރަށް ބޮޑު ފަސޭހައެއް ކަމަށް ވެސް އެމަނިކުފާނު ފާހަގަކުރެއްވިއެވެ.
އަރަބިއްޔާ ސްކޫލުގެ އައު އިމާރާތް ނިމުމުން، ދަރިވަރުންނަށް މިހާރަށްވުރެ ފުޅާ ދާއިރާއެއްގައި ތައުލީމީ ޚިދުމަތްތައް ފޯރުކޮށްދެވޭނެ ކަމަށް ވަޒީރު ވިދާޅުވިއެވެ.
ރިއެކްޓް
ރަނގަޅު
0
ސަކަރާތް
0
ލޯބި
0
މަޖާ
0
