އައު ޑަޔާލިސިސް ސެންޓަރާއެކު ކިއުގައި ތިބެންޖެހުން ނިމުމަކަށް

ހުޅުމާލޭގައި އަލަށް ހުޅުވާލެވުނު ޑަޔަލިސިސް ސެންޓަރުގެ ސަބަބުން މި ޚިދުމަތް ހޯދުމަށް ކިއުގައި ޖެހިގެން ތިބެންޖެހޭ ހާލަތު ނިމުމަކަށް އަންނާނެކަމަށް މާލެ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް އަބްދުލް ރައްޒާގް ހަލީމް ވިދާޅުވެއްޖެއެވެ.

އަބްދުއްރައްޒާޤް މިފަދައިން ވިދާޅުވީ ހުޅުމާލޭ ޑަޔަލިސިސް ސެންޓަރުގެ ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.

މި ރަސްމިއްޔާތުގައި ރައީސް ޑރ. މުޙައްމަދު މުޢިއްޒު ބައިވެރިވެވަޑައިގެންނެވި އެވެ.

ހުޅުމާލޭ ޑަޔަލިސިސް ސެންޓަރުގެ ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ހަލީމް ފާހަގަކުރެއްވި ގޮތުގައި، މި ސެންޓަރުގައި 30 އެނދު ޤާއިމުކުރެވި، ކްރިޓިކަލް ހާލަތްތަކަށް އިތުރު ދެ އެނދު ޚާއްޞަކުރެވިފައިވެއެވެ. މީގެއިތުރުން، ގައިން ގަޔަށް އަރާ ބަލިތަކުގެ ކޭސްތަކުގައި އައިސޮލޭޝަންގެ ޚިދުމަތްވެސް މި ސެންޓަރުން ލިބޭނެއެވެ.

މި ސެންޓަރު ޤާއިމުކުރެވިފައިވަނީ ގުޅިގެން ހިންގުމަށް ހުޅުވާލެވުނު ފުރުޞަތުގެ ދަށުން، ބީލަން ހުށަހެޅި ފަރާތްތަކުގެ ތެރެއިން ޝޯޓްލިސްޓް ކުރުމުގެ މަސައްކަތް ނިންމުމަށްފަހުގައެވެ. މި މަޝްރޫޢުގައި މެޑްޓެކް މޯލްޑިވްސް އަދި މެޑިކޮމް ޕްރައިވެޓް ލިމިޓެޑްގެ އިސް ދައުރެއް އަދާކޮށްފައިވެއެވެ.

ހަލީމް އިތުރަށް ހާމަކުރެއްވި ގޮތުގައި، ކުރިއަށް އޮތް ތަނުގައި ހޮސްޕިޓަލުގެ މެންޓަލް ހެލްތުގެ ޚިދުމަތްތައްވެސް ފުޅާކުރުމަށް ވަނީ ރޭވިފައެވެ. އަދި ހުޅުމާލެ ހޮސްޕިޓަލުގައި 28 އެނދުގެ ވޯޑެއް މި އަހަރުގެ ތެރޭގައި ނިންމުމަށް ވަނީ ހަމަޖެހިފައެވެ.