އޮގަސްޓް 1 އިން ފެށިގެން ބެންކް އޮފް މޯލްޑިވްސް ގައި އިންޑިއަން ރުޕީ އެކައުންޓު ހުޅުވޭނެ
ބެންކް އޮފް މޯލްޑިވްސް (ބީއެމްއެލް) އިން މިއަދު ހާމަކުރި ގޮތުގައި އޮގަސްޓް 1 އިން ފެށިގެން އެ ބޭންކުގައި އިންޑިއަން ރުޕީ އެކައުންޓު ހުޅުވުމުގެ ހިދުމަތް ފަރުދުންނާއި ވިޔަފާރިތަކަށް ލިބޭނެއެވެ.
ބީއެމްއެލްގެ ފަރާތުން އިއުލާނު ކޮށްފައިވާ ގޮތުން، މި ހިދުމަތް ލިބިގަތުމަށް ބޭނުންވާ ފަރާތްތަކަށް އިންޓަނެޓް އަދި މޯބައިލް ބޭންކިންގ އެޕް މެދުވެރިކޮށް ވަރަށް ފަސޭހަކަމާއެކު އެކައުންޓު ހުޅުވޭނެއެވެ. މި އެކައުންޓުތަކަށް ރާއްޖެއިން ބޭރުން އިންޑިއަން ރުޕީ ޖަމާކުރުމުގެ އިތުރުން، ބީއެމްއެލްގެ އެހެނިހެން އެކައުންޓުތަކާ ދެމެދު ފަސޭހަކަމާއެކު ފައިސާ ޓްރާންސްފަރ ކުރެވޭނެއެވެ.
މި ހިދުމަތް ތައާރަފުކުރަން މި އިއުލާނުކުރެވުނީ އިންޑިއާގެ ބޮޑުވަޒީރު ނަރެންދުރަ މޯދީ ރަސްމީ ދަތުރުފުޅެއްގައި ރާއްޖޭގައި ހުންނެވި ދަނޑިވަޅެއްގައެވެ. މިއީ ދެ ގައުމުގެ ދެމެދުގައި އިގްތިސާދީ ގުޅުން އިތުރަށް ބަދަހިކުރުމަށް އެޅޭ މުހިންމު ފިޔަވަޅެއް ކަމުގައި ބެލެވެއެވެ.
އިންޑިއަން ރުޕީ އެކައުންޓު ހުޅުވުމުގެ ހިދުމަތް ތައާރަފުކުރުމާއެކު، ރާއްޖެއާއި އިންޑިއާއާ ދެމެދު ކުރެވޭ ވިޔަފާރީގެ މުއާމަލާތްތައް އިތުރަށް ފަސޭހަވެގެންދާނެ ކަމަށް ބެލެވެއެވެ. މީގެ އިތުރުން، ރާއްޖޭގައި ދިރިއުޅޭ އިންޑިއާގެ ރައްޔިތުންނަށާއި، އިންޑިއާގައި ކިޔަވާ ދިވެހި ދަރިވަރުންނަށްވެސް މި ހިދުމަތުގެ ފައިދާ ކުރާނެއެވެ.
ބީއެމްއެލްއިން ބުނެފައިވާ ގޮތުގައި، މި ހިދުމަތާ ގުޅޭ އިތުރު މައުލޫމާތު އެ ބޭންކުގެ ވެބްސައިޓާއި ސޯޝަލް މީޑިއާ ޕްލެޓްފޯމްތަކުން ލިބެން ހުންނާނެއެވެ. އަދި އެކައުންޓު ހުޅުވުމާ ގުޅޭ އެހީތެރިކަން ބޭނުންވާ ފަރާތްތަކަށް ބޭންކުގެ ބްރާންޗުތަކުންނާއި ކޯލް ސެންޓަރ މެދުވެރިކޮށް އެހީތެރިކަން ފޯރުކޮށްދެވޭނެއެވެ.
ރިއެކްޓް
ރަނގަޅު
0
ސަކަރާތް
0
ލޯބި
0
މަޖާ
0
