ފެމިލީ ކޯޓުގައި ޖޫން މަހު 180 ކައިވެނި އަދި 63 ވަރި

ފެމިލީ ކޯޓުން އާއްމު ކޮށްފައިވާ ތަފާސް ހިސާބުތަކުން ދައްކާ ގޮތުން މިދިޔަ މަހު އެ ކޯޓުން 180 ކައިވެނި އަދި 63 ވަރި ކޮށްދީފައިވެއެވެ. 

ފެމިލީ ކޯޓުގެ 2025 ވަނަ އަހަރުގެ ޖޫން މަހުގެ ކާވެންޏާއި ވަރީގެ ތަފާސްހިސާބު pic.twitter.com/XgZM5D4NHc — Family Court of the Maldives (@FamilyCourtMv) July 17, 2025

ވަރީގެ މައްސަލަތަކުގެ ތަފާސްހިސާބަށް ބަލާއިރު، ކޯޓަށް ޖޫން މަހު ހުށަހެޅުނީ 61 ވަރީގެ މައްސަލަ އެވެ. އަދި މެއި މަހުގެ ބާކީ 81 މައްސަލަ އާއި އެކު މިހާރު ނުނިމި ހުރި މައްސަލައިގެ އަދަދަކީ 100 އެވެ. 

ގެވެށި އަނިޔާ އާއި ގުޅިގެން 08 މައްސަލަ ޖޫން މަހު ކޯޓަށް ހުށަހެޅިފައި ވާއިރު އޭގެ ތެރެއިން އަންހެނުން ހުށަހެޅި މައްސަލައިގެ އިންސައްތަ އަކީ %75 އެވެ. 

ކުޑަކުދިންނާއި ގުޅޭ މައްސަލަ ތަކާއި ގުޅިގެން އެންމެ ގިނައިން ހުށަހެޅިފައި ވަނީ ހަޟާނާތުގެ މައްސަލައެވެ. އެގޮތުން ހަޟާނާތުގެ 16 މައްސަލަ އަދި ނުނިމި ހުރިއިރު، ކުއްޖާ އިހުތިޔާރު ކުރާ ފަރާތެއް ކަނޑައެޅުމުގެ 10 މައްސަލަ އަދި ދަރިން  ނުދެއްކުމުގެ 10 މައްސަލަ އަދި ނުނިމެއެވެ. 

ހަރަދުގެ މައްސަލަ އާއި ގުޅޭ 21 މައްސަލަ އަދި ނުނިމި ހުރިއިރު، ފެމިލީ ކޯޓުން މި މަހު ވަނީ ދަރިންނަށް ހަރަދު ނުދޭ ބައްޕައިންގެ ފޮޓޯ އާއްމު ކުރަން ފަށާފައެވެ.