އެމެރިކާއިން އީރާނަށް ހަމަލާދޭން ފެށުމާއެކު ތެލުގެ އަގު އުފުލިއްޖެ

އެމެރިކާއިން ދިން އާ ހަމަލާތަކާ ގުޅިގެން ސުލްހައިގެ އެއްބަސްވުމަކަށް އާދެވިދާނެ ކަމަށް ކުރެވުނު އުންމީދުތަކަށް ހުރަސްއެޅި، ދުނިޔޭގެ ބާޒާރުގައި ތެލުގެ އަގު އުފުލިއްޖެއެވެ.

މީގެ އިތުރުން ހިއްސާގެ ބާޒާރަށް ވެސް ވަނީ ނުތަނަވަސްކަން ކުރިމަތިވެފައެވެ.

އީރާނުގެ ދެކުނުގެ ސަރަހައްދުތަކަށް އެމެރިކާ ސިފައިން ހަމަލާދީފައިވަނީ ދިފާއީ ފިޔަވަޅެއްގެ ގޮތުގައި ކަމަށް އެމެރިކާއިން ބުނެފައިވެއެވެ. މި ހަމަލާތައް ދީފައިވަނީ ތިން މަސް ދުވަހަށް ދެމިގެން ގޮސްފައިވާ ހަނގުރާމަ ހުއްޓާލުމާ ގުޅޭގޮތުން އީރާނުގެ އިސް މަންދޫބުން ގަތަރުގެ ބޮޑުވަޒީރާ އެކު ދޯހާގައި މަޝްވަރާ ކުރައްވަމުން ގެންދަވަނިކޮށެވެ. އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވީ އެއްބަސްވުމަކަށް އައުމަށް އަދި ދުވަސްތަކެއް ނަގާފާނެ ކަމަށެވެ.

މި ކަންތަކާ ގުޅިގެން އޭޝިއާގެ ބާޒާރުގައި ބްރެންޓް ފިއުޗާސްގެ އަގު 2 އިންސައްތައަށް ވުރެ މައްޗަށް ގޮސް، ފީފާއެއްގެ އަގު 98.21 ޑޮލަރަށް ވަނީ އުފުލިފައެވެ. އެމެރިކާގެ ވެސްޓް ޓެކްސަސް އިންޓަމީޑިއޭޓް ކްރޫޑްގެ އަގުވެސް ވަނީ ހޯމަ ދުވަހާ އަޅާބަލާއިރު ކުޑަކޮށް މައްޗަށް ޖެހިލާފައެވެ.

ކޮމަންވެލްތު ބޭންކް އޮފް އޮސްޓްރޭލިއާގެ ސްޓްރެޓެޖިސްޓް ޖޯސެފް ކަޕޫރްސޯ ވިދާޅުވީ، އެއްބަސްވުމަކާ ގާތްވެފައިވާ ކަމަށް ތަކުރާރުކޮށް އިވެމުންދިޔަ ނަމަވެސް، އެ އެއްބަސްވުމުގެ ސިފަ އޮތްގޮތާއި ހޯރްމޫޒް ކަނޑުއޮޅި ހުޅުވާލާނެ ތާރީޚެއް ނޭނގޭތީ ބާޒާރުގައި ޝައްކުތަކެއް އެބަހުރި ކަމަށެވެ. "ދުނިޔޭގެ އިގްތިސާދަށް ހަނގުރާމަ ނުހުއްޓި ދިގުލައިގެން ދިއުމަކީ ގެއްލުން ހުރި ކަމެއް ކަމަށްވާތީ، ބާޒާރުން ބޭނުންވަނީ އަވަހަށް މިކަން ނިމުމަކަށް އައުމަށް،" އޭނާ އިތުރަށް ވިދާޅުވިއެވެ.

ހިއްސާގެ ބާޒާރުތަކަށް ބަލާއިރު، ޖަޕާނުގެ ނިކޭ އިންޑެކްސް 0.14 އިންސައްތަ ދަށަށް ގޮސްފައިވާއިރު، ހޮންކޮންގްގެ ހިއްސާގެ ބާޒާރު ވަނީ 0.5 އިންސައްތަ މައްޗަށް ޖެހިލާފައެވެ. އެމެރިކާ ޑޮލަރުގެ އަގު ހަމައަކަށް އެޅިފައިވީ ނަމަވެސް، ޔޫރޯ އާއި ސްޓާލިން ޕައުންޑްގެ އަގު ވަނީ ކުޑަކޮށް ދަށަށް ގޮސްފައެވެ.

ސްޓޭންޑަޑް ޗާޓަރޑްގެ ގްލޯބަލް ރިސާޗް ހެޑް އެރިކް ރޮބަޓްސަން ލަފާކުރައްވާ ގޮތުގައި، ޖިއޯޕޮލިޓިކަލް ނުތަނަވަސްކަން ކުޑަވާ ދަނޑިވަޅުތަކުގައި ބާޒާރުގެ އިންޓްރެސްޓް ރޭޓްތަކަށް ބަދަލު އައި ނަމަވެސް، އިންފްލޭޝަން ނުވަތަ ތަކެތީގެ އަގު އުފުލުމުގެ ބިރު ދިގު މުއްދަތަކަށް ދެމިއޮންނާނެއެވެ. މީގެ އިތުރުން ރަނުގެ އަގު ވަނީ 1 އިންސައްތަ ދަށަށް ގޮސް، އައުންސެއް 4,525.18 ޑޮލަރަށް ތިރިވެފައެވެ.