ކަނޑުމަގުން ރާއްޖެއަށް ވަގަށް އެތެރެކުރަން އުޅުނު ގިނަ އަދަދެއްގެ ސިނގިރޭޓު މޯލްޑިވްސް ކަސްޓަމްސް ސަރވިސް އިން އަތުލައިގެންފިއެވެ.

މި ތަކެއްޗަކީ ބާޒާރުގެ އަގުތަކަށް ބަލާއިރު ގާތްގަނޑަކަށް 27.6 މިލިއަން ރުފިޔާގެ އަގުހުރި ތަކެތި ކަމަށް ކަސްޓަމްސް އިން މައުލޫމާތުދެއެވެ.

ކަސްޓަމްސް އިން މިއަދު ހާމަކުރި ގޮތުގައި، މި ތަކެތި އަތުލައިގަނެފައިވަނީ މި ހިނގާ ނޮވެމްބަރު މަހުގެ 14 ވަނަ ދުވަހު މާލޭ ކޮމާޝަލް ހާބަރުގައި ހިންގި އޮޕަރޭޝަނެއްގައެވެ. މި އޮޕަރޭޝަންގައި ޖުމްލަ 2,304,200 ސިނގިރޭޓު ސްޓިކް އަތުލައިގެންފައިވާ ކަމަށް އެ އިދާރާއިން ބުނެއެވެ.

މި މައްސަލައާ ގުޅޭގޮތުން ކަސްޓަމްސް އިން ބުނީ، މިއީ ކަނޑުމަގުން ރާއްޖެއަށް ސިއްރުން އެތެރެކުރަން މަސައްކަތް ކުރި ތަކެތި ކަމަށެވެ. ނަމަވެސް، މި ތަކެތި އެތެރެކުރި ގައުމާއި، މިކަމުގައި ޝާމިލުވާ ފަރާތްތަކާ ގުޅޭ އިތުރު ތަފްސީލެއް ކަސްޓަމްސް އިން އަދި ހާމައެއް ނުކުރެއެވެ.

ރާއްޖެއަށް ވަގަށް އެތެރެކުރާ މުދާ ހޯދުމަށް ކަސްޓަމްސް އިން އަންނަނީ ހާއްސަ އޮޕަރޭޝަންތަކެއް ކުރިއަށް ގެންދަމުންނެވެ. މިގޮތުން ފަހަކަށް އައިސް ކަނޑުމަގުންނާއި ވައިގެ މަގުން ރާއްޖެއަށް އެތެރެކުރަން އުޅޭ ގަވާއިދާ ހިލާފު ތަކެތި އަތުލައިގަންނަ މިންވަރު ވަނީ އިތުރުވެފައެވެ.