އެމެރިކާއިން 2،500 ސިފައިންނާއި އެސޯލްޓް މަނަވަރެއް މެދުއިރުމައްޗަށް ފޮނުވަނީ
އީރާނާއި، އެމެރިކާ އަދި އިސްރާއީލާ ދެމެދު ހިނގަމުންދާ ހަމަނުޖެހުންތައް އިތުރަށް ވަރުގަދަވަމުންދާތީ، އެމެރިކާއިން ގާތްގަނޑަކަށް 2,500 މެރިން ސިފައިންނާއި ހަނގުރާމަމަތީ ބޮޑު މަނަވަރެއް މެދުއިރުމައްޗަށް ފޮނުވުމަށް އަމުރުކޮށްފި އެވެ.
މި ފައުޖުގައި ހިމެނެނީ 31 ވަނަ މެރިން އެކްސްޕެޑިޝަނަރީ ޔުނިޓުގެ ބައިތަކެވެ. މިއީ ހަނގުރާމައިގެ އޮޕަރޭޝަންތަކާއި، މީހުން ސަލާމަތްކުރުމާއި، ކުއްލި ނުރައްކަލުގެ ހާލަތްތަކުގައި ހަރަކާތްތެރިވުމުގެ ގާބިލުކަން ލިބިފައިވާ "ރެޕިޑް ރެސްޕޮންސް" ފައުޖެކެވެ. މި ސިފައިން ދަތުރުކުރާނީ ޔޫ.އެސް.އެސް ޓްރިޕޮލީ LHA-7 ގައެވެ. މިއީ ކަނޑުމަތީގެ އަސްކަރީ މަރުކަޒެއްގެ ގޮތުގައި ބޭނުންކުރެވޭ، ހެލިކޮޕްޓަރާއި، ފައިޓަރ ޖެޓް އަދި އެމްފިބިއަސް އޮޕަރޭޝަންތަކަށް ބޭނުންކުރާ އުޅަނދުފަހަރު އުފުލޭ ފަދަ އެމްފިބިއަސް އަސޯލްޓް މަނަވަރެކެވެ.
މި ފައުޖު ފޮނުވަން ނިންމާފައިވަނީ، މި ސަރަހައްދުގެ އަސްކަރީ މަރުކަޒުތަކަށާއި މުހިންމު ތަންތަނަށް އަމާޒުކޮށް މިސައިލާއި ޑްރޯން ހަމަލާތައް ދީ، މަސްރަހު ގޯސްވިތާ ގާތްގަނޑަކަށް ދެ ހަފުތާ ފަހުންނެވެ.
އެމެރިކާގެ އޮފިޝަލުން ވިދާޅުވީ، މި ނިންމުމުގެ ބޭނުމަކީ އެ ސަރަހައްދުގައި އެމެރިކާގެ އަސްކަރީ ބާރު ވަރުގަދަކުރުމާއި، ހަމަނުޖެހުން އިތުރަށް ފުޅާވެއްޖެ ނަމަ އަވަސް ފިޔަވަޅު އެޅުމުގެ ގާބިލުކަން ކަށަވަރުކުރުމެވެ. މީގެ އިތުރުން، ދުނިޔޭގެ ތެޔޮ އުފުލާ އެންމެ މުހިންމު އެއް މަގު ކަމަށްވާ ސްޓްރެއިޓް އޮފް ހޯރްމޫޒް ފަދަ ކަނޑުގެ މުހިންމު މަގުތަކުގެ ރައްކާތެރިކަން ދެމެހެއްޓުމަށް ވެސް މި ފައުޖުގެ އެހީތެރިކަން ލިބޭނެއެވެ.
އެމެރިކާގެ ދިފާއީ އިދާރާ، ޕެންޓަގަނުން ބުނެފައިވަނީ މި ފައުޖު ފޮނުވުމަކީ ކޮންމެހެން އެއްގަމު މަގުން ހަނގުރާމައެއް ފަށަން އުޅޭކަމުގެ ނިޝާނެއް ނޫން ކަމަށެވެ. ނަމަވެސް، ކަމުގެ ތަކުރިބާކާރުން ވިދާޅުވާ ގޮތުގައި މި ފިޔަވަޅުގެ ސަބަބުން މެދުއިރުމަތީގައި ކުރިމަތިވެދާނެ ނުރައްކާތަކަށް ނުވަތަ ކުއްލި ހާލަތްތަކަށް އަވަސް ރައްދު ދިނުމުގެ ގާބިލުކަން އެމެރިކާއަށް ވަރަށް ބޮޑަށް އިތުރުވެގެންދާނެއެވެ.
ރިއެކްޓް