އަމާނާތްތެރި ހިދުމަތް، މާލެ ސިޓީގެ ވިންދު - އެމްޑީޕީގެ މާލޭ މެނިފެސްޓޯ ލޯންޗުކޮށްފި

އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ލޯކަލް ކައުންސިލް އިންތިހާބަށް އަމާޒުކޮށް، މާލެ ސިޓީގެ ތަރައްގީއާއި ހިންގުމަށް އެ ޕާޓީން ގެންގުޅޭ ތަސައްވުރު ހިމެނޭ މެނިފެސްޓޯ ރޭ މާލޭގައި ބޭއްވި ކެމްޕޭން ޖަލްސާގައި ނެރެފި އެވެ.

އަމާނާތްތެރި ހިދުމަތް، މާލެ ސިޓީގެ ވިންދު ނަމުގައި ނެރުނު މި މެނިފެސްޓޯ ބިނާކޮށްފައިވަނީ ރައްޔިތުންގެ ދިރިއުޅުމުގެ ފެންވަރު މަތިކުރުމަށާއި، ކުދި އަދި މެދު ފަންތީގެ ވިޔަފާރިތައް ކުރިއެރުވުމަށާއި، މާލޭގައި ހިންގުމުގައި ރައްޔިތުންގެ ބައިވެރިވުން އިތުރުކުރުމުގެ މައްޗަށެވެ.

ޖަލްސާގައި ވާހަކަދެއްކެވި ބޭފުޅުން މި މެނިފެސްޓޯ ސިފަކުރީ ތޮއްޖެހިފައިވާ މާލޭގެ ރައްޔިތުންނަށް ދިމާވެފައިވާ ކުނި މެނޭޖުކުރުމާއި، އުމްރާނީ ތަރައްގީއާއި، ފެންބޮޑުވުމުގެ މައްސަލައިގެ އިތުރުން މުނިސިޕަލް ހިދުމަތްތައް ފޯރުކޮށްދިނުމުގައި ހުރި ދަތިތަކަށް ހައްލު ހޯދައިދިނުމަށް އެކުލަވާލާފައިވާ ރޯޑްމެޕެއްގޮތުގަ އެވެ،

މި ޖަލްސާގައި ވާހަކަދައްކަވަމުން މާލެ ސިޓީގެ މޭޔަރު އާދަމް އާޒިމް ވަނީ ސިޓީއަށް ކުރިމަތިވެފައިވާ ގޮންޖެހުންތަކަށް އަމަލީ ހައްލުތަކެއް ހޯދުމުގެ މުހިންމުކަމުގެ މައްޗަށް އަލިއަޅުއްވާލައްވާފަ އެވެ. އާޒިމް ވިދާޅުވީ، މި ކެމްޕޭނުގައި އިސްކަންދޭނީ އަމިއްލަ ފަރުދުންނަށް ރައްދުދީ ހަމަލާދިނުމުގެ ބަދަލުގައި، މާލޭގައި ހުރި މައްސަލަތަކަށް ހައްލު ހޯދައިދިނުމަށާއި އަމަލީ ގޮތުން ކުރެވޭނެ ކަންކަން ހުށަހެޅުމަށް ކަމަށެވެ.

މީގެ އިތުރުން، މާލޭގެ ހިންގުން ހަރުދަނާކޮށް ކުރިއެރުވުމަށްޓަކައި ރައްޔިތުންގެ އެއްބާރުލުން މެދުނުކެނޑި ބޭނުންވާނެ ކަމަށާއި، ހިދުމަތްތަކާއި އުމްރާނީ ވަސީލަތްތައް ރަނގަޅުކުރުމަށް ރައްޔިތުންނާއި ކައުންސިލާ ދެމެދު އޮންނަ ގުޅުން ބަދަހިވުން ކޮންމެހެން މުހިންމު ކަމަށް އާޒިމް ފާހަގަކުރެއްވި އެވެ.

މެނިފެސްޓޯ ނެރުމުގެ ރަސްމިއްޔާތުގައި ވާހަކަދެއްކެވި އެމްޑީޕީގެ އެހެން އިސްވެރިން ވިދާޅުވީ، ކުރިއަށް އޮތް ލޯކަލް ކައުންސިލް އިންތިހާބަކީ ލާމަރުކަޒީ ނިޒާމު ވަރުގަދަކުރުމަށާއި މުޅި ރާއްޖޭގެ ރައްޔިތުންނާ ގުޅުން ބަދަހިކުރުމަށް ލިބޭ މުހިންމު ފުރުސަތެއް ކަމަށެވެ. އަދި މި އިންތިހާބުން ލިބޭ ކާމިޔާބީއަކީ ރަށު ފެންވަރުގައި ޕާޓީގެ ހަރަކާތްތައް އަލުން ވަރުގަދަކުރުމަށް ލިބޭނެ ބޮޑު ބާރެއް ކަމަށްވެސް އެ ބޭފުޅުން ވިދާޅުވި އެވެ.

ލޯކަލް ކައުންސިލް އިންތިހާބު ބޭއްވުމަށް ތާވަލުކޮށްފައިވަނީ 4 އެޕްރީލް 2026 ގައެވެ. މި އިންތިހާބުގައި ރާއްޖޭގެ ހުރިހާ ރަށު ކައުންސިލްތަކާއި، ސިޓީ ކައުންސިލްތަކުގެ އިތުރުން އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް މެންބަރުން އިންތިހާބު ކުރާނެ އެވެ.