އެމެރިކާ އަދި އިސްރޭލުން އިރާނުގެ ސުކޫލަކަށް ދިން ހަމަލާއެއްގައި 40 މީހުން މަރުވެއްޖެ

އީރާނުގެ ދެކުނުގައި ހުންނަ އަންހެން ކުދިންގެ ޕްރައިމަރީ ސުކޫލަކަށް ދިން މިސައިލް ހަމަލާއެއްގައި މަދުވެގެން 40 މީހުން މަރުވެފައިވާ ކަމަށް އީރާނުގެ ދައުލަތުގެ މީޑިއާތަކުން ރިޕޯޓްކޮށްފިއެވެ.

މި ހަމަލާ އަމާޒުވެފައިވަނީ ހޯރްމުޒްގާން ޕްރޮވިންސްގެ މިނާބް ސިޓީގައި ހުންނަ ސުކޫލަކަށް ކަމަށް މައުލޫމާތު ލިބެއެވެ. އޮފިޝަލުން ވިދާޅުވާ ގޮތުގައި މަރުވި މީހުންގެ ތެރޭގައި ގިނައީ ދަރިވަރުންނެވެ. އަދި މި ހާދިސާގައި އެތައް ބަޔަކު ޒަޚަމްވެފައިވާއިރު، ރެސްކިއު ޓީމުތަކުން ދަނީ އެ ސަރަހައްދުގައި މީހުން ހޯދުމާއި ސަލާމަތްކުރުމުގެ މަސައްކަތް ކުރަމުންނެވެ.

އިރާނުން މި ހަމަލާގެ ޒިންމާ އަޅުވާފައިވަނީ އެމެރިކާއާއި އިޒްރޭލުގެ ބޮލުގައެވެ. އީރާނުން ތުހުމަތުކުރާ ގޮތުގައި މިއީ އެ ގައުމުގެ އަސްކަރީ އަދި އިސްތިރާތީޖީ އިންފްރާސްޓްރަކްޗަރަށް އަމާޒުކޮށް ހިންގާ ފުޅާ އަސްކަރީ އޮޕަރޭޝަނެއްގެ ބައެކެވެ. ނަމަވެސް، ސުކޫލަށް ދިން މި ހަމަލާއާ ގުޅޭގޮތުން ވޮޝިންގޓަނުން ނުވަތަ ތަލް އަވީވުން އަދި ވަކި އެއްޗެއް ހާމަކޮށްފައެއް ނުވެއެވެ.

މި ހާދިސާ ހިނގާފައިވަނީ އެ ސަރަހައްދުގައި ނުތަނަވަސްކަން އިންތިހާއަށް ބޮޑުވެފައިވާ ދަނޑިވަޅެއްގައެވެ. މީގެ ސަބަބުން ބަދަލުހިފުމުގެ ހަމަލާތަކެއް އަތުވެދާނެ ކަމުގެ ބިރުވެރިކަމާއި، ހަނގުރާމަ ފުޅާވެގެން ހިނގައިދާނެ ކަމުގެ ބިރު ވަނީ އިތުރުވެފައެވެ. ހާދިސާގެ މަސްރަހު ބަދަލުވަމުންދާތީ، މަރުވި މީހުންގެ އަދަދު މިނިވަން ފަރާތްތަކުން ކަށަވަރުކުރުމުގައި އަދި ވަނީ ދަތިތަކެއް ކުރިމަތިވެފައެވެ.