ކޮރަޕްޝަން ނައްތާލުމުގެ މަސައްކަތަށް ކުރިއެރުމެއް ނުލިބޭ، ސީ.ޕީ.އައި އިން ރާއްޖެއަށް 39 ޕޮއިންޓް

ކޮރަޕްޝަން ނައްްތާލުމަށް ރާއްޖޭގައި ކުރެވޭ މަސައްކަތްތަކުން އެއްވެސް އެދެވޭ ނަތީޖާއެއް ނުނިކުންނަކަން ހާމަވެއްޖެއެވެ.

ޓްރާންސްޕޭރެންސީ އިންޓަނޭޝަނަލްއިން އާންމުކުރި 2025 ވަނަ އަހަރުގެ ކޮރަޕްޝަން ޕާސެޕްޝަން އިންޑެކްސް (ސީ.ޕީ.އައި) އިން ދައްކާ ގޮތުގައި، ކޮރަޕްޝަން ހުއްޓުވުމުގައި ދިވެހިރާއްޖެއަށް އަދިވެސް ވަނީ ބޮޑެތި ގޮންޖެހުންތަކަކާ ކުރިމަތިލާން ޖެހިފައެވެ. މި އަހަރުގެ އިންޑެކްސްގައި ރާއްޖެއަށް 100 އަކުން ލިބިފައިވަނީ 39 ޕޮއިންޓެވެ. މިއާއެކު، ދުނިޔޭގެ 182 ގައުމުގެ ތެރެއިން ރާއްޖެ ހިމެނެނީ 91 ވަނަ ދަރަޖައިގައެވެ.

ދައުލަތުގެ ހާމަކަން ބޮޑުކުރުމަށާއި ޖަވާބުދާރީކުރުވުން ހަރުދަނާކުރުމަށް މި ސަރުކާރުން ތަކުރާރުކޮށް ވައުދުވަމުންދިޔަ ނަމަވެސް، 2024 ވަނަ އަހަރާ އަޅާބަލާއިރު ފެންނަން އޮތީ ވަރަށް ކުޑަ ބަދަލެކެވެ. ނިމިދިޔަ އެމްޑީޕީ ސަރުކާރުގެ ދައުރުގައި، 2020 ވަނަ އަހަރު ރާއްޖެއިން ވަނީ 43 ޕޮއިންޓް ހޯދައި، ދުނިޔޭގެ ރޭންކިންގެ 75 ވަނައަށް ޖެހިލާފައެވެ. ނަމަވެސް، އެ ކުރިއެރުން ދެމެހެއްޓޭ ގޮތް ނުވެ، 2023 ވަނަ އަހަރު ނިމުނުއިރު އަނެއްކާވެސް ވަނީ 39 ޕޮއިންޓަށް ދަށަށް ގޮސްފައެވެ.

މިހާރުގެ ސަރުކާރު ވެރިކަމާ ހަވާލުވި ފަހުން ވެސް މި ހާލަތު ބަދަލުކުރުމަށް އެދެވޭ މަސައްކަތްތަކެއް ކުރެވިފައި ނުވާކަމަށާއި، ގެނެވުނު އިސްލާހުތަކަކީ ހަމައެކަނި ނަމަކަށް ގެނެވުނު ބަދަލުތަކެއްގެ ގޮތުގައި ފާހަގަކުރެވެއެވެ. ދާއިރާގެ މާހިރުންނާއި ކަމާބެހޭ އިދާރާތަކުން އިންޒާރުދޭ ގޮތުގައި، މި ނަތީޖާއިން ދޭހަވަނީ ދައުލަތް ހިންގުމުގެ ނިޒާމުގައި ހުރި ބޮޑެތި ބަލިކަށިކަންކަމެވެ.

މިގޮތުން މުއައްސަސާތައް މޮނިޓަރކުރުން ބަލިކަށިވުމާއި، މަތީ ފަންތީގެ ކޮރަޕްޝަންގެ މައްސަލަތައް ބެލުމުގައި ޝަރުއީ ނިޒާމު ލަސްވުމާއި، އަދި މުއައްސަސާީ އިސްލާހުތަކުން އެދެވޭ ނަތީޖާއެއް ނުފެނުން ފާހަގަކުރެވެއެވެ. ފާޑުކިޔާ ފަރާތްތަކުން ބުނާ ގޮތުގައި، ސަރުކާރަށް ދެ އަހަރަށްވުރެ ގިނަ ދުވަސް ވެފައިވާއިރު، ކޮރަޕްޝަނާ ދެކޮޅަށް އެޅި ފިޔަވަޅުތަކުން އެދެވޭ ނަތީޖާއެއް ނުފެނުމުގެ ސަބަބުން، ދައުލަތް ޖަވާބުދާރީކުރުވުމާ މެދު ރައްޔިތުންގެ މެދުގައި އޮތް އިތުބާރު ވަނީ ތާރީޚީ މިންވަރަކަށް ދަށަށް ގޮސްފައެވެ.

2025 ވަނަ އަހަރުގެ ސީ.ޕީ.އައި ރިޕޯޓަކީ، ހަމައެކަނި އިސްލާހީ ވާހަކަތަކަކުން ނަތީޖާ ނުނެރެވޭނެކަން ހަނދާންކޮށްދޭ ވަރުގަދަ މެސެޖެކެވެ. މިކަމުގައި ހަރުދަނާ ފިޔަވަޅުތަކެއް ނާޅައިފިނަމަ، ދައުލަތުގެ މުއައްސަސާތަކަށް އޮތް އިތުބާރު އިތުރަށް ގެއްލި، ބައިނަލްއަގުވާމީ މައިދާނުގައި ރާއްޖޭގެ އަބުރަށް ބޮޑެތި ގެއްލުންތަކެއް ލިބުމުގެ ބިރު އެބައޮތެވެ.