އިރާނުގެ ނިއުކްލިއާ ޓެކްނޮލޮޖީއަކީ "ފޮހެލެވޭނެ" އެއްޗެއް ނޫން ކަމަށް އެގައުމުން ބުނެފި
ބޭރުގެ ބާރުތަކުން އިރާނުގެ ނިއުކްލިއަރ އިންފްރާސްޓްރަކްޗަރަށް ތަކުރާރުކޮށް ދެމުންދާ ހަމަލާތަކާއެކުވެސް، އެ ގައުމުގެ ނިއުކްލިއާ ޓެކްނޮލޮޖީއާއި ގާބިލުކަމަކީ އަސްކަރީ ހަމަލާތަކަކުން ނައްތާލެވޭނެ އެއްޗެއް ނޫން ކަމަށް އިރާނުގެ އިސްވެރިން އަނެއްކާވެސް ވިދާޅުވެއްޖެ އެވެ.
އިރާނުގެ ފޮރިން މިނިސްޓަރު އައްބާސް އަރަގްޗީ ދެއްވި އިންޓަވިއުއެއްގައި ވިދާޅުވީ، އިރާނުގެ ނިއުކްލިއާ މަރުކަޒުތަކަށް ދޭ ވައިގެ ހަމަލާތަކުގެ ސަބަބުން ގެއްލުންތަކެއް ލިބުނު ނަމަވެސް، އެކަމުގެ އަސާސީ ސައިންޓިފިކް ތަޖުރިބާއާއި ޓެކްނޮލޮޖީގެ ގާބިލުކަން ނައްތައެއް ނުލެވޭނެ ކަމަށެވެ. އަދި މި ޕްރޮގްރާމަކީ އެ ގައުމުގެ ސައިންޓިފިކް މުޖުތަމައުއާއި ސިނާއީ ބިންގަލުގެ މައްޗަށް ބިނާވެފައިވާ ކަމެއްކަން އޭނާ ފާހަގަކުރެއްވި އެވެ. ނިއުކްލިއަރ ސިނާއަތަށް ބޭނުންވާ އީޖާދީ އިލްމާއި ފަންނީ ވަސީލަތްތަކަކީ ހަމައެކަނި ބޮން އެޅުމަކުން "ހަލާކުކޮށްލެވޭނެ" ކަންކަން ނޫން ކަމަށް އޭނާ ބާރުއަޅުއްވައި ވިދާޅުވި އެވެ.
މި ވާހަކަތައް އައިސްފައިވަނީ ނަތަންޒް، ފޯޑޯ އަދި އިސްފަހާން ފަދަ މުހިންމު ނިއުކްލިއަރ މަރުކަޒުތަކަށް އަމާޒުކޮށް، އެމެރިކާއާއި އިސްރާއީލުން މިދިޔަ އަހަރު ދިން އަސްކަރީ ހަމަލާތަކަކަށް ފަހުގަ އެވެ. ތެހެރާނުން ތަކުރާރުކޮށް ބުނަމުންދަނީ، ގެއްލުން ލިބިފައިވާ ތަންތަން އަލުން ބިނާކޮށް، އެ ގައުމުގެ ނިއުކްލިއަރ މަސައްކަތްތައް ކުރިއަށް ގެންދާނެ ކަމަށެވެ. އަދި މިއީ ގައުމުގެ މިނިވަންކަމާ ގުޅިފައިވާ ހައްގެއް ކަމަށާއި، ދިރާސާތައް ހުއްޓުވުމަށް ބޭރުގެ ބާރުތަކުން ކުރާ ފިއްތުންތައް ކުށްވެރިކުރާ ކަމަށްވެސް ބުނެފައިވެއެވެ.
އިރާނުގެ އަސްކަރިއްޔާގެ ވެރިޔާވެސް ވަނީ ބާރުގެ ބޭނުންކޮށްގެން އެ ގައުމުގެ ނިއުކްލިއާ ޕްރޮގްރާމް ނައްތާނުލެވޭނެ ކަމުގެ އިންޒާރު ދެއްވާފަ އެވެ. އަދި އެމެރިކާއާއި ސަރަހައްދީ އެހެން ފަރާތްތަކާއެކު އޮތް ނުތަނަވަސްކަން ދެމިއޮތް ނަމަވެސް، އިރާނުގެ ދިފާއީ ތައްޔާރީތައް މަތީ ދަރަޖައެއްގައި އޮތްކަން އޭނާ ފާހަގަކުރެއްވި އެވެ.
ރިއެކްޓް