އަމީރު މުނައްވަރަށް: މަރުކަޒީ ބޭންކުގެ އިތުބާރު ގެއްލޭ ކަންކަން ހުއްޓާލާ

މަރުކަޒީ ބޭންކުގެ މިނިވަންކަން ދަމަހައްޓައި، އެ ބޭންކުގެ ގަދަރާއި އިތުބާރު ގެއްލޭ ކަންކަން ހުއްޓާލުމަށް ކުރީގެ ފިނޭންސް މިނިސްޓަރު އިބްރާހިމް އަމީރު، އެމްއެމްއޭގެ ގަވަރުނަރު އަހުމަދު މުނައްވަރަށް ގޮވާލައްވައިފިއެވެ.

ސޯޝަލް މީޑިއާގައި ކުރެއްވި ޕޯސްޓެއްގައި އަމީރު ވިދާޅުވެފައިވަނީ، ރައީސް މުޢިއްޒުގެ މުޢިއްޒު ސަރުކާރުން އެމްއެމްއޭ މެދުވެރިކޮށް ޕެންޝަން އޮފީސް ބޭނުންކޮށްގެން ސަރުކާރު ހިންގުމަށް ފައިސާ ޗާޕުކުރަން މަސައްކަތްކުރަމުންދާ މަސައްކަތަކީ އަދި ފެށުން ކަމަށާއި ކައިރި މުސްތަގުބަލުގައި މިކަން ތަކުރާރުކުރާނެ ކަމަށާއި އޭގެ ސަބަބުން ދައުލަތުގެ މުއައްސަސާތަކަށް އޮންނަ އިތުބާރު ގެއްލި، ފައިސާގެ އަގު ދަށްވެ، ތަކެތީގެ އަގުތައް މައްޗަށް ދިއުމުގެ ނުރައްކާ އިތުރުވެގެންދާނެ ކަމަށެވެ.

އަމީރު ފާހަގަކުރެއްވި ގޮތުގައި، ސަރުކާރުން މިހާރު ޕެންޝަން އޮފީސް މެދުވެރިކޮށް 2.5 ބިލިއަން ރުފިޔާ ޕްރިންޓްކުރުމަށް މަސައްކަތް ކުރަމުންދާކަމަށާއި މިކަން ކުރިއަށް އޮތް މަސްތަކުގައި ތަކުރާރުކޮށް، އަންނަ އަހަރު ރާއްޖޭގެ ދަރަނި އަދާކުރަން އުނދަގޫވާނެއެވެ.

އަދި މީގެ އިތުރުން، "އެމްއެމްއޭ އަދި ބޭންކް އޮފް މޯލްޑިވްސް ސިޔާސީވެ، ރައްޔިތުންގެ އިތުބާރު ގެއްލެމުންދާ" ކަމަށް އަމީރު ވިދާޅުވިއެވެ.

އަމީރު އިތުރަށް ވިދާޅުވި ގޮތުގައި، އެމްއެމްއޭގެ ރިޒާވްގައި މިހާރު ހުރި 850 މިލިއަން ޑޮލަރުގެ ތެރެއިން އިންޑިއާއިން ނަގާފައިވާ 400 މިލިއަން ޑޮލަރު ނޮވެމްބަރުގައި ދައްކަންޖެހޭއިރު، މިފައިސާ ދެއްކުމުން ރިޒާވް ބޮޑުތަނުން ދަށަށްދާނެ ކަމަށާއި، ބާކީ ހުންނާނީ ރިޒާވުން މަދު ބައެއް ކަމަށެވެ. އަދި ސަރުކާރަށް ޑޮލަރު ގަންނާނެ ފައިސާއެއް ނުހުންނާނެ ކަމަށާއި، މިހާރުވެސް ބިލުތައް ދައްކަން ފައިސާ ޕްރިންޓްކުރަން މަސައްކަތްކުރަމުންދާއިރު އަންނަ އަހަރުގެ ކުރީކޮޅާ ހަމައަށް 7.7 ބިލިއަން ރުފިޔާ ޕްރިންޓްކުރާނެ ކަމަށް ބެލެވޭކަމަށް އަމީރު ވިދާޅުވިއެވެ.

އަދި މިހާރު ކަންކަން ހިނގަމުންދާ ގޮތުން، ބޭރުން ފައިސާ ހޯދުމާއި އިޤްތިޞާދު ހަމައަކަށް އެޅުވުން އުނދަގޫ އަދި ޚަރަދު ބޮޑު ކަމަކަށް ވެގެންދާނެ ކަމަށް އިންޒާރުދެއްވަމުން މިއަހަރު ޖީޑީޕީ ދަށަށްދާނެ ކަމަށް ލަފާކުރެވޭ ކަމަށްވެސް އަމީރު ވިދާޅުވިއެވެ.