އިސްރާއީލުން ޣައްޒާގެ 115 މީހަކު ޝަހީދު ކޮށްލައިފި

"ގިޑިއޯން ޗެރިއޮޓްސް" ގެ ނަމުގައި ކުރިއަށްގެންދާ މި އޮޕަރޭޝަންގެ ދަށުން ޣައްޒާގެ ސަރަޙައްދުތަކެއް "ކޮންޓްރޯލް ކުރުމަށް" ސިފައިން ވަންނާނެކަމަށް އިސްރާއީލުން ބުނެފައިވެއެވެ. ހަމައެއާއެކު، ޣައްޒާގެ އުތުރު ސަރަޙައްދުތަކުން ފަލަސްޠީނު މީހުން ފިލައިގެން ދިއުމަށް އިސްރާއީލުން އަމުރުކޮށްފައިވާއިރު، ހުކުރު ދުވަހުގެ ފަތިހުން ފެށިގެން މިހާތަނަށް އެތައް ބަޔަކުވަނީ ޣައްޒާ ދޫކޮށް ގޮސްފައެވެ.

ޣައްޒާގެ ހޮސްޕިޓަލްތަކަށް ގިނަ އަދަދެއްގެ ޒަޚަމްވެފައިވާ މީހުން ގެންދެވެމުންދާއިރު، ހޮސްޕިޓަލްތަކުގައި ކަފުން ފޮތި ނެތުމުން ޝަހީދުވާ މީހުންގެ ޖަނާޒާ ބޭއްވުމަށް ދަތިވެފައިވާކަމަށް ރިޕޯޓުތައް ބުނެއެވެ.

ޣައްޒާގެ އުތުރު ސަރަޙައްދުގައި ފާއިތުވި ދެ ދުވަހުގެ ތެރޭގައި އިސްރާއީލްގެ އަނިޔާވެރިކަން އިތުރުވެފައިވާ ކަމަށް ރިޕޯޓްތައް ބުނެއެވެ.

މީގެއިތުރުން، ޣައްޒާގައި ކުރިއަށްދާ ބްލޮކޭޑްގެ ސަބަބުން އެތައްބަޔަކު ބަނޑުހައިހޫނުކަމުގައި އުޅެމުންދާއިރު ގިނަމީހުންތިބީ ޒަރޫރީ ބޭނުންތަކުންވެސް މަހުރޫމް ވެފައެވެ.

ޣައްޒާގެ އިރުމަތީ ސަރަޙައްދުގައި، ޚާއްޞަކޮށް ޝުޖާއިޔާ އަދި ޒައިތޫން ހިސާބުތަކުގައި، ބޮޑެތި ގޮވުންތަކުގެ އަޑު އިވެމުންދާކަމަށް ރިޕޯޓުތަކުން ދައްކައެވެ. މި ސަރަޙައްދުތަކުގައި އިސްރާއީލުގެ ސިފައިން ފާއިތުވި ހަފްތާތަކުގައި ގޭގެ ތަޅާލުމުގެ ހަރަކާތްތައް ހިންގަމުން ގެންގޮސްފައިވެއެވެ. "އިރުމަތީ ސަރަޙައްދުގެ މުޅި ހިސާބު ވަނީ ބޮޑެތި ވީރާނާ ބިންތަކަކަށް ބަދަލުވެފައި" ކަމަށް ރިޕޯޓުތަކުގައި ބުނެފައިވެއެވެ.

އިސްރާއީލުން ބުނާގޮތުގައި މިއީ ހަމާސްގެ އިންފްރާސްޓްރަކްޗަރ އަމާޒުކޮށްގެން ދެވޭ ހަމަލާތަކެކެވެ. ނަމަވެސް، މި އަމާޒުތަކަކީ ގިނަފަހަރަށް މީހުން ދިރިއުޅޭ ގެތަކާއި، ވަގުތީ ހިޔާތަކާއި، ޓެންޓުތަކާއި، އަދި ހާލުގައި ޖެހިފައިވާ ފަލަސްޠީނުމީހުން ހިމާޔަތްކުރުމަށް ބޭނުންކުރާ އާންމު ތަންތަން ކަމަށް ފާހަގަކުރެވެއެވެ.

އެމެރިކާގެ ނިއުސް މީޑިއާއެއްކަމަށްވާ އެންބީސީ ނިއުސްއިން ރިޕޯޓުކޮށްފައިވާ ގޮތުގައި ޓްރަމްޕް ސަރުކާރުން އެއް މިލިއަން ފަލަސްޠީނުމީހުން ޣައްޒާއިން ނެރެ ލީބިޔާއަށް ބަދަލުކުރުމުގެ ޕްލޭނެއް އެކުލަވާލަމުންދެއެވެ. މި ޕްލޭނަކީ "އަޚްލާޤީގޮތުން ނުބައި އަދި އިންސާނިއްޔަތާ ދެކޮޅަށް ކުރެވޭ ތާރީޚީ ކުށެއް" ކަމަށް ބުނެ އެމެރިކާގެ މުސްލިމް ޖަމާޢަތެއްކަމަށްވާ ކައުންސިލް އޮން އެމެރިކަން-އިސްލާމިކް ރިލޭޝަންސް (ކެއަރ) އިން މި ޕްލޭން ކުށްވެރިކޮށްފައިވެއެވެ.

މިއީ މުޅި ތާރީޚުގައި ވެސް ނުފެންނަވަރުގެ ނޭއްގާނީ ނުބައި ޢަމަލެއް" ކަމަށް ކެއަރގެ ނޭޝަނަލް އެގްޒެކެޓިވް ޑިރެކްޓަރ ނިހާދު އަވާދު ބުނެފައިވެއެވެ.