ހަނިމާދޫ އެއަރޕޯޓުގެ މަސައްކަތް ސެޕްޓެމްބަރަށް ނިންމަނީ

ހަނިމާދޫ އިންޓަރނޭޝަނަލް އެއަރޕޯޓުގެ ޢަމަލީ މަސައްކަތް މި އަހަރުގެ ސެޕްޓެމްބަރު މަހަށް ނިންމާލެވޭނެ ކަމަށް އިމާރާތްކުރުމާއި ގެދޮރުވެރިކަމާ ބިނާވެށި ތަރައްޤީކުރުމާބެހޭ ވަޒީރު ޑރ. ޢަބްދުﷲ މުއްޠަލިބް ވިދާޅުވެއްޖެއެވެ.

އިންޑިއަން އެގްޒިމް ބޭންކުގެ ލައިން އޮފް ކްރެޑިޓްގެ ދަށުން ކުރިއަށްގެންދާ މި މަޝްރޫޢުގެ 88.7 އިންސައްތަ މަސައްކަތް މިހާރު ވަނީ ނިމިފައެވެ.

ވަޒީރު މުއްޠަލިބް ދެއްވި މަޢުލޫމާތުގައި، 2،460 މީޓަރުގެ އާ ރަންވޭގެ މަސައްކަތް މުޅިން ނިމި، މިހާރު ފްލައިޓްތައް ޖެއްސުމަށް ބޭނުންކުރަމުންދަނީ މި ރަންވޭގެ ބައެއް ކަމަށް ވިދާޅުވިއެވެ. އެއަރޕޯޓުގެ ޕެސެންޖަރ ޓަރމިނަލްގެ 83 އިންސައްތަ މަސައްކަތް ނިމި، އެއަރ ޓްރެފިކް ކޮންޓްރޯލް ޓަވަރު، ހެންގަރު އަދި ކާގޯ ބިލްޑިންގގެ 96 އިންސައްތަ މަސައްކަތް ވަނީ ނިންމާފައެވެ.

The development of Hanimaadhoo International Airport, financed through the India Exim Bank Line of Credit, remains on track for completion by September 2025. The overall progress stands at 88.7%, with runway construction fully completed. The passenger terminal has reached 83%… pic.twitter.com/vLbXd5NnDs — Abdulla Muththalib (@muththo) July 1, 2025

މި މަޝްރޫޢުގެ ދަށުން ފިއުލް ޖެޓީއާއި، ފިއުލް ފާމް، އިންޖީނުގެ، ޓަރމިނަލް ޖެޓީ އަދި އެއަރޕޯޓަށް އަންނަ ފަސިންޖަރުންނަށް މަޑުކޮށްލެވޭނެ ޓަރމިނަލް ފްރަންޓް އިމާރާތެއްވެސް ދަނީ ތަރައްޤީކުރަމުންނެވެ. އަތޮޅުތަކުގެ އެއަރޕޯޓެއްގައި ބޭނުންކުރާ ފުރަތަމަ އެއިރޯ ބްރިޖް ހިމެނޭ މި އެއަރޕޯޓުގެ ޓަރމިނަލްގައި ދެ ފަންގިފިލާ ހިމެނޭއިރު، ތިރީ ފަންގިފިލާ ބޭނުންކުރާނީ އެތެރޭގެ އުދުހުންތަކަށެވެ. މަތީ ފަންގިފިލާ ޚާއްޞަކުރެވިފައިވަނީ ބައިނަލްއަޤްވާމީ ދަތުރުތަކަށެވެ.

ގާތްގަނޑަކަށް ދެ ބިލިއަން ރުފިޔާގެ މި މަޝްރޫޢުގެ ދަށުން ތަރައްޤީކުރެވޭ އެއަރޕޯޓުގައި އެއްފަހަރާ 9 ފްލައިޓް ޕާކުކުރެވޭނެ އޭޕްރަންއެއް ވަނީ ޤާއިމުކޮށްފައެވެ. މީގެ ތެރޭގައި 3 އެއަރބަސް އަދި 6 އޭޓީއާރް މަތިންދާބޯޓު ޕާކުކުރެވޭނެ ޖާގަ ހިމެނެއެވެ.

މަޝްރޫޢު އަވަހަށް ނިންމުމަށްޓަކައި 800 އަށްވުރެ ގިނަ މުވައްޒަފުން 24 ގަޑިއިރު މަސައްކަތް ކުރަމުންދާއިރު، މި އެއަރޕޯޓުން އަހަރަކު 1.3 މިލިއަން ފަސިންޖަރުންނަށް ޚިދުމަތް ދެވޭނެކަމަށް މިނިސްޓްރީން ވަނީ ބުނެފައެވެ.

އޭ320 އަދި ބޮއިންގް 737 ފަދަ ބޮޑެތި މަތިންދާބޯޓުތަކަށް ޚިދުމަތް ދެވޭނެ މި އެއަރޕޯޓަކީ މުޅި އުތުރުގެ އިޤްތިޞާދަށް ބޮޑު ކުރިއެރުމެއް ގެނުވާނެ މަޝްރޫޢުއެއްގެ ގޮތުގައި ސަރުކާރުން ސިފަކުރެއެވެ.