އިސްރާއީލުގެ ކަރަންޓު އުފައްދާ މަރުކަޒަކަށް އީރާނުގެ މިސައިލް ހަމަލާއެއް

އީރާނުން އިސްރާއީލަށް ދިން މިސައިލް ހަމަލާތަކަކާ ގުޅިގެން، އިސްރާއީލުގެ އައްސޭރިފަށުގެ ރަށެއް ކަމަށްވާ ހަޑޭރާގައި ހުންނަ ރާބިން ޕަވާ ޕްލާންޓް ކައިރީގައި އަލިފާނުގެ ހާދިސާއެއް ހިނގައިފިއެވެ. 

މި ހާދިސާއަކީ އީރާނުން ފޮނުވާލި މިސައިލްތަކުގެ ސަބަބުން ހިނގި ހާދިސާއެއް ކަމަށް ރިޕޯޓްތައް ބުނެއެވެ.

އިސްރާއީލުގެ މީޑިއާތަކުން ރިޕޯޓްކޮށްފައިވާ ގޮތުގައި، އީރާނުގެ މި ހަމަލާތަކާ ގުޅިގެން ތެލް އަވީވް މެޓްރޮޕޮލިޓަން ސަރަހައްދާއި އިސްރާއީލުގެ މެދުތެރޭގެ އެކި ސަރަހައްދުތަކުގައި ނުރައްކަލުގެ ސައިރަންގެ އަޑު މެދުނުކެނޑި އިވެމުން ދިޔައެވެ. މި ހަމަލާތަކުގެ ސަބަބުން އެ ސަރަހައްދުތަކުގެ ރައްޔިތުންގެ މެދުގައި ބޮޑު ބިރުވެރިކަމެއް އުފެދުނެވެ.

އިސްރާއީލުގެ ޗެނަލް 12 އިން ރިޕޯޓްކުރި ގޮތުގައި، 30 މިނެޓްގެ ތެރޭގައި އީރާނުން ތިން ފަހަރެއްގެ މަތިން މިސައިލްތައް އުދުއްސާލާފައިވެއެވެ. އިސްރާއީލުގެ ދިފާއީ ނިޒާމުން މި މިސައިލްތައް ހުއްޓުވި ނަމަވެސް، ވައިގެ ތެރޭގައި ގޮއްވާލި މިސައިލްތަކުގެ ބައިތައް އެކި ސަރަހައްދުތަކުގެ 30 އަށްވުރެ ގިނަ ތަނަށް ވެއްޓިފައިވާ ކަމަށް އެ މީޑިއާއިން ބުނެއެވެ.

މި ހަމަލާތަކާ ގުޅިގެން އިސްރާއީލުގެ އިލެކްޓްރިކް ކޯޕަރޭޝަނުން ބަޔާނެއް ނެރެފައިވެއެވެ. އެ ކުންފުނިން ބުނި ގޮތުގައި، ރާބިން ޕަވާ ޕްލާންޓް ކައިރިއަށް ހަމަލާތައް އަމާޒުވި ނަމަވެސް، ކުންފުނީގެ އިންފްރާސްޓްރަކްޗާ ނުވަތަ ކަރަންޓު އުފައްދާ ނިޒާމަށް އެއްވެސް ކަހަލަ ގެއްލުމެއް ލިބިފައެއް ނުވެއެވެ.

އެހެންނަމަވެސް، މިސައިލްގެ ބައިތައް ވެއްޓުމުގެ ސަބަބުން އެ ސަރަހައްދުގެ ހުސްބިންތަކުގައި އަލިފާން ރޯވެފައިވާތީ، އެމާޖެންސީ ސާވިސްތަކުން އެ ސަރަހައްދުގައި ހަރަކާތްތެރިވެ އަލިފާން ނިއްވުމުގެ މަސައްކަތް ކޮށްފައިވާ ކަމަށް އިސްރާއީލުގެ މީޑިއާތަކުން ވަނީ ކަށަވަރުކޮށްދީފައެވެ.