އޮސްޓްރޭލިއާގެ ހަނގުރާމަ މަނަވަރުތައް ހޮރްމޫޒަކަށް ނުފޮނުވާނަން: ކެތަރިން ކިންގް

މިނިސްޓަރު ކިންގް މިހެން ވިދާޅުވީ، މިހާރު ބަންދުކޮށްފައިވާ ހޮރްމޫޒް ކަނޑުއޮޅި ހުޅުވާފައި ބެހެއްޓުމަށް އެހީތެރިވުމަށް އެމެރިކާގެ ރައީސް ޑޮނަލްޑް ޓްރަމްޕް ބައިނަލްއަގުވާމީ މުޖުތަމައަށް ގޮވާލައްވާފައިވާ ދަނޑިވަޅެއްގައެވެ. ކިންގް ވިދާޅުވީ އޮސްޓްރޭލިއާގެ ފަރާތުން މިހާރުވެސް ދިފާއީ ދާއިރާއިން އެހީތެރިކަން ފޯރުކޮށްދެމުންދާ ކަމަށާއި، އެގޮތުން ޔޫއޭއީއަށް އެހީތެރިވުމަށް މަތިންދާބޯޓު ފޯރުކޮށްދީފައިވާ ކަމަށެވެ.

"އަހަރުމެން ހޮރްމޫޒް ކަނޑުއޮޅިއަށް ހަނގުރާމަ މަނަވަރެއް ނުފޮނުވާނަން. އެއީ ގަބޫލުކުރަން ދަތި މުހިންމު ކަމެއްކަން އަހަރެމެންނަށް އެނގޭ،" މިނިސްޓަރު ކިންގް ވިދާޅުވިއެވެ. އޮސްޓްރޭލިއާގެ އިތުރުން ޖަޕާނުން ވެސް ވަނީ އެ ސަރަހައްދަށް ހަނގުރާމަ މަނަވަރުތައް ފޮނުވުމާ ދެކޮޅު ހަދާފައެވެ.

އީރާނާއި އޮމާނާ ދެމެދު އޮންނަ ހޮރްމޫޒް ކަނޑުއޮޅިއަކީ ދުނިޔޭގެ އިގްތިސާދަށް ނުހަނު މުހިންމު މަގެއްކަން ފާހަގަކުރައްވައި، ރައީސް ޓްރަމްޕް ވަނީ އެ މަގު ހުޅުވާފައި ބެހެއްޓުމަށް ދުނިޔޭގެ ބޮޑެތި ބާރުތަކުން ހަނގުރާމަމަތީ އުޅަނދުތައް ފޮނުވާނެ ކަމަށް އުއްމީދުކުރައްވާ ކަމަށް ވިދާޅުވެފައެވެ. ޓްރަމްޕްގެ "ޓްރޫތް ސޯޝަލް" ގައި ކުރެއްވި ޕޯސްޓެއްގައި ޗައިނާ، ފްރާންސް، ޖަޕާން، ދެކުނު ކޮރެއާ އަދި އިނގިރޭސިވިލާތުގެ ނަން ފާހަގަކުރެއްވި ނަމަވެސް، އެކަން ކުރާނެ ގޮތުގެ ތަފްސީލެއް ދެއްވާފައެއް ނުވެއެވެ.

ހޮރްމޫޒް ކަނޑުއޮޅިއަކީ ދުނިޔޭގެ ޖުމްލަ ތެލުގެ ސަޕްލައިގެ ގާތްގަނޑަކަށް 20 އިންސައްތަ ދަތުރުކުރާ އެންމެ މުހިންމު އެއް މަގެވެ. އެ ސަރަހައްދުގެ ސަލާމަތާއި ރައްކާތެރިކަން ގެއްލި، ދަތުރުފަތުރަށް ބުރޫއަރައިފި ނަމަ ދުނިޔޭގެ ބާޒާރުގައި ތެލުގެ އަގު އިންތިހާއަށް އުފުލި، ސަރަހައްދީ ހަމަނުޖެހުން ބޮޑުވެގެންދާނެ ކަމުގެ ބިރު އޮތީ ހީވެފައެވެ.