އިސްރާއީލުގެ މިސައިލް އިންޓަސެޕްޓަރުތައް ހުސްވަމުންދާކަމަށް އެމެރިކާއަށް އަންގައިފި

އީރާނާއެކު ހިނގަމުންދާ ކުރިމަތިލުންތައް އިތުރަށް ވަރުގަދަވަމުންދާއިރު، އިސްރާއީލުގެ ބެލިސްޓިކް މިސައިލް އިންޓަސެޕްޓަރުތަކުގެ ތެރެއިން ބައެއް ބާވަތްތައް ވަރަށް ބޮޑަށް ހުސްވަމުންދާކަން އެމެރިކާއަށް އަންގާފައިވާ ކަމަށް، ރިޕޯޓްތައް ބުނެފިއެވެ. 

މި ރިޕޯޓްތައް ބުނާގޮތުން، ހަފުތާތަކެއް ވަންދެން މެދުނުކެނޑި ދެމުންދިޔަ ހަމަލާތަކާ ގުޅިގެން، ދުރު ރާސްތާގެ ބެލިސްޓިކް މިސައިލްތައް ހުއްޓުވުމަށް ބޭނުންކުރާ އިންޓަސެޕްޓަރުތަކުގެ ސްޓޮކް ވަރަށް ބޮޑަށް މަދުވެފައިވާކަން އިސްރާއީލުގެ އޮފިޝަލުން ދާދި ފަހުން އެމެރިކާގެ ކަމާބެހޭ ފަރާތްތަކަށް ވަނީ އަންގާފައެވެ.

ހަނގުރާމަ ފެށުނީއްސުރެ، އީރާނުން ދަނީ އިސްރާއީލަށް އަމާޒުކޮށް ގިނަ އަދަދެއްގެ މިސައިލާއި ޑްރޯން ހަމަލާތައް ފޮނުވަމުންނެވެ. މީގެ ސަބަބުން އިސްރާއީލުގެ ވައިގެ ދިފާއީ ނިޒާމުތަކަށް ވަނީ ގިނަ އަދަދެއްގެ ހަމަލާތައް ހުއްޓުވަން މަޖުބޫރުވެފައެވެ. މި ހަމަލާތައް ހުއްޓުވަން ޖެހޭ މިންވަރު އިތުރުވުމުގެ ސަބަބުން އިސްރާއީލުގެ މިސައިލް ދިފާއީ ނިޒާމަށް ވަނީ ބާރު ބޮޑުވެފައެވެ.

މި ބުނާ އިންޓަސެޕްޓަރުތަކަކީ މައިގަނޑު ގޮތެއްގައި އެ ގައުމުގެ ދުރު ރާސްތާގެ މިސައިލް ދިފާއީ ނިޒާމުތައް ކަމަށްވާ "އެރޯ" މިސައިލް ޑިފެންސް ސިސްޓަމާއި، މެދު ރާސްތާގެ "ޑޭވިޑްސް ސްލިންގް" ގައި ބޭނުންކުރާ ތަކެތި ކަމަށް ބެލެވެއެވެ. މި ނިޒާމުތަކަކީ ބެލިސްޓިކް އަދި ކްރޫޒް މިސައިލްތައް، މީހުން ދިރިއުޅޭ ސަރަހައްދުތަކަށް ނުވަތަ އިސްތިރާތީޖީ މަރުކަޒުތަކަށް ފޯރުމުގެ ކުރިން ހަލާކުކޮށްލުމަށް ފަރުމާކޮށްފައިވާ ނިޒާމުތަކެކެވެ.