އެ ގައުމަށް ހަމަލާދީފިނަމަ، ސަރަހައްދީ ތެލާއި ގޭހުގެ މަރުކަޒުތަކަށް ހަމަލާދޭނެކަމަށް އިރާނުން ބުނެފި

އީރާނުގެ ތެލާއި ގޭހުގެ ވަސީލަތްތަކަށް ހަމަލާދިނުން ކުރިއަށްދާނަމަ، މުޅި މެދުއިރުމަތީގެ ހަކަތައާ ގުޅޭ މަރުކަޒުތަކަށް ހަމަލާދޭނެކަމުގެ އިންޒާރު އީރާނުގެ ވަރުގަދަ އަސްކަރީ ފައުޖު، އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ދީފިއެވެ.

ބައިނަލްއަގުވާމީ މީޑިއާތަކުން ރިޕޯޓްކޮށްފައިވާ ބަޔާނެއްގައި އައި.އާރު.ޖީ.ސީ އިން ބުނެފައިވަނީ، އީރާނުގެ ހަކަތައިގެ ދާއިރާއަށް އިތުރު ހަމަލާއެއް އަމާޒުވެއްޖެނަމަ، މުޅި ސަރަހައްދުގެ ތެލާއި ގޭހުގެ ވަސީލަތްތަކަށް ބަދަލުހިފުމުގެ ހަމަލާތައް ދޭނެ ކަމަށެވެ. އޮފިޝަލުން އިންޒާރު ދެއްވި ގޮތުގައި މިފަދަ އަމަލުތަކުގެ ސަބަބުން ސަރަހައްދީ ހަކަތައިގެ އިންފްރާސްޓްރަކްޗަރު "އަނދައިގެން" ދިއުމަށް މަގުފަހިވެދާނެއެވެ. މިއީ މިހާރު ހިނގަމުންދާ ހަމަނުޖެހުންތައް އިތުރަށް ފުޅާވެގެން ހިނގައިދާނެކަމުގެ އިޝާރާތެކެވެ.

މި އިންޒާރު ދީފައިވަނީ އީރާނުގެ ބޮޑެތި ސިޓީތަކުގެ ކައިރީގައި ހުރި ތެޔޮ ރައްކާކުރާ އަދި ބަހާ މަރުކަޒުތައް ހިމެނޭހެން، އެ ގައުމުގެ ހަކަތައާ ގުޅުންހުރި ތަންތަނަށް ދާދި ފަހުން ދިން ހަމަލާތަކާ ގުޅިގެންނެވެ. އީރާނުގެ އޮފިޝަލުން ބުނާ ގޮތުގައި އެ ތަންތަނަކީ ގައުމުގެ މަދަނީ ހަކަތައިގެ މުހިންމު ތަންތަނެވެ. ނަމަވެސް މި ހަމަލާތަކަކީ އެމެރިކާއާއި އިސްރާއީލާ ގުޅިފައިވާ އަސްކަރީ ކުރިމަތިލުންތަކުގެ ބައެއް ކަމަށް ވަނީ ބެލެވިފައެވެ.

މި އިންޒާރަށް އަމަލީ ސިފައެއް އަތުވެއްޖެނަމަ ދުނިޔޭގެ ހަކަތައިގެ ބާޒާރަށް ބޮޑެތި އަސަރުތަކެއް ކުރާނެއެވެ. މެދުއިރުމަތީގައި ދުނިޔޭގެ އެންމެ ބޮޑެތި ތެލާއި ގޭހުގެ ވަސީލަތްތައް ހުރިއިރު، އޭގެ ތެރޭގައި ގަލްފުގެ ގައުމުތަކުގައި ހުރި ތެޔޮ ސާފުކުރާ ކާރުހާނާތަކާއި، ހޮޅިލައިންތަކާއި، އެކްސްޕޯޓް ޓާމިނަލްތައް ހިމެނެއެވެ.

މިފަދަ އިންފްރާސްޓްރަކްޗަރަކަށް ހަމަލާދިނުމަކީ ދުނިޔެއަށް ހަކަތަ ފޯރުކޮށްދިނުމަށް ބުރޫއަރައި، ތެލުގެ އަގު އިތުރަށް އުފުލިގެންދާނެ ކަމެކެވެ. މިހާރުވެސް ހަމަނުޖެހުންތަކާ ގުޅިގެން ތެޔޮ ފީފާއެއްގެ އަގު ވަނީ 100 ޑޮލަރަށްވުރެ މައްޗަށް އަރާފައެވެ.