'އެޕްސްޓީން ފައިލްސްގައި' ނަން ހިމެނުމުން ސްލޮވާކިއާގެ ނެޝަނަލް ސެކިއުރިޓީ އެޑްވައިޒަރު އިސްތިއުފާ ދީފި
ޖެފްރީ އެޕްސްޓީންގެ މައްސަލައާ ގުޅިގެން އަލަށް އާންމުކުރި ސިއްރު ލިޔެކިޔުންތަކުގައި ނަން ހިމެނުމާ ގުޅިގެން ފާޑުކިޔުން އަމާޒުވުމުން، ސްލޮވާކިއާގެ ނޭޝަނަލް ސެކިއުރިޓީ އެޑްވައިޒަރު މިރޮސްލާވް ލައިޗާކް މަގާމުން އިސްތިއުފާ ދީފި އެވެ.
ކުރިން ހާރިޖީ ވަޒީރުކަން ވެސް ކުރައްވާފައިވާ ތަޖުރިބާކާރު ޑިޕްލޮމެޓް ލައިޗާކް ވިދާޅުވީ، އޭނާ މަގާމުން އެކަހެރިވީ ބޮޑުވަޒީރު ރޮބަޓް ފީކޯގެ ސަރުކާރަށް މިކަމުގެ ސަބަބުން ނޭދެވޭ އަސަރެއް ފޯރުމަށް ބޭނުން ނުވާތީ ކަމަށެވެ. އޭނާ ވަނީ އެއްވެސް ގޯސް އަމަލެއް ހިންގަވާފައި ނުވާނެ ކަމަށް ވިދާޅުވެ، އެޕްސްޓީންގެ އަމަލުތައް ހަރުކަށި އިބާރާތުން ކުށްވެރިކުރައްވާފަ އެވެ.
އެމެރިކާގެ ކޯޓަކުން އަލަށް ހާމަކުރި މި ލިޔެކިޔުންތަކުގައި، ލައިޗާކް ހާރިޖީ ވަޒީރުގެ މަގާމުގައި ހުންނެވި ދުވަސްވަރު އެޕްސްޓީންއާ ދެމެދު ބަދަލުކުރެވުނު މުއާމަލާތްތަކެއް ހިމެނޭ ކަމަށް ރިޕޯޓްތައް ބުނެ އެވެ. ނަމަވެސް، ސްލޮވާކިއާގެ ކަމާބެހޭ ފަރާތްތަކުން ކަށަވަރުކޮށްދީފައިވާ ގޮތުގައި، މި މައްސަލައާ ގުޅިގެން ލައިޗާކްގެ މައްޗަށް އެއްވެސް ޖިނާއީ ދައުވާއެއް އުފުލާފައެއް ނުވެ އެވެ.
ބޮޑުވަޒީރު ފީކޯ ވަނީ ލައިޗާކްގެ އިސްތިއުފާ ގަބޫލުކުރައްވާފަ އެވެ. އަދި ލައިޗާކް ގައުމަށް ކޮށްދެއްވި ދިގު ހިދުމަތްތައް ފާހަގަކުރައްވަމުން، މި މައްސަލައަކީ ނާޒުކު ކަމެއްކަން ބޮޑުވަޒީރު ފާހަގަކުރެއްވި އެވެ. އިދިކޮޅު ސިޔާސީ ފަރާތްތަކުން ކުރިން ވެސް ވަނީ މި މައްސަލައިގެ ސަބަބުން ދައުލަތުގެ މުއައްސަސާތަކަށް އޮތް އިތުބާރު ގެއްލޭ ކަމަށް ބުނެ، އޭނާ މަގާމުން ވަކިވުމަށް ގޮވާލާފައެވެ.
ރިއެކްޓް