ޑޮނަލްޑް ޑަކް ފަދަ އެކައުންޓުތައް ވެރިފައިކޮށްދޭތީ އީޔޫ އިން 'އެކްސް' ޖޫރިމަނާކޮށްފި

އޮޅުން އަރާފަދަ ގޮތަކަށް ނުވަތަ ހަގީގަތާ ހިލާފު އެކައުންޓްތަކަކީ އަސްލު އެކައުންޓްތަކެއް ކަމަށް ހީވާ ފަދަ ގޮތަކަށް، ފައިސާ ދައްކައިގެން "ވެރިފިކޭޝަން" ނުވަތަ ނޫ ފާހަގަ ލިބޭ ގޮތަށް އޮތުމުން، އީލޮން މަސްކްގެ އެކްސް ޕްލެޓްފޯމް 45 މިލިއަން ޔޫރޯ އިން ޔޫރަޕިއަން ޔޫނިއަން (އީޔޫ) އިން ޖޫރިމަނާކޮށްފި އެވެ.
އީޔޫގެ ޑިޖިޓަލް ސާވިސަސް އެކްޓް (ޑީއެސްއޭ) ގެ ދަށުން މި ފިޔަވަޅު އަޅާފައިވަނީ، އެކްސް އިން އަލަށް ތައާރަފުކުރި "ބްލޫ ޗެކްމާކް" ނިޒާމާ ގުޅިގެންނެވެ. މި ނިޒާމުގެ ދަށުން، އެކައުންޓްގެ ވެރިފަރާތަކީ ކާކުކަން ކަށަވަރު ކުރުމުގެ އެކަށީގެންވާ ނިޒާމެއް ނެތި، ހަމައެކަނި ފައިސާ ދައްކައިގެން ނޫ ފާހަގަ ހޯދުމުގެ ފުރުސަތު އޮވެ އެވެ. އީޔޫގެ ރެގިއުލޭޓަރުން ބުނާ ގޮތުގައި، މި ނިޒާމުގެ ސަބަބުން އެއީ އަސްލު އެކައުންޓެއްކަން ކަށަވަރު ނުކުރެވޭތީ، ބޭނުންކުރާ ފަރާތްތަކަށް ބޮޑެތި އޮޅުންތަކެއް އެރުމުގެ ފުރުސަތު އެބައޮތެވެ.

ޔޫރަޕިއަން ކޮމިޝަނުން މި ނިންމުން ނިންމުމުގައި ފާހަގަކޮށްފައިވާ ގޮތުގައި، "ޑޮނަލްޑް ޑަކް" ފަދަ މަޖާ ނަންނަމުގައި ހަދާފައިވާ އެކައުންޓްތަކުގައި ވެސް ނޫ ފާހަގަ ހުރެ އެވެ. މީގެ ސަބަބުން އެއީ އަސްލު މީހުންގެ އެކައުންޓްތައް ކަމަށް އާންމުންނަށް ގަބޫލުކުރެވުމުގެ ފުރުސަތު އޮތް ކަމަށް ކޮމިޝަނުން ވަނީ ބުނެފަ އެވެ.

މި ޖޫރިމަނާއަކީ އެކްސްއާ ދެކޮޅަށް އީޔޫ އިން އަޅަމުންދާ ފިޔަވަޅުތަކުގެ ތެރެއިން އެއް ފިޔަވަޅެވެ. މީގެ އިތުރުން އިޝްތިހާރު ކުރުމުގައި ހާމަކަން ބޮޑު ގޮތެއްގައި އަމަލުކުރުމަށާއި، ދިރާސާކުރާ ފަރާތްތަކަށް ޕްލެޓްފޯމްގެ މައުލޫމާތު ފޯރުކޮށްދިނުމާ ގުޅޭ ކަންކަން ވެސް މީގެ ތެރޭގައި ހިމެނެ އެވެ.

ޑީއެސްއޭގެ ދަށުން، މިފަދަ ސީރިއަސް ނުވަތަ ތަކުރާރުވާ މައްސަލަތަކުގައި ކުންފުނީގެ އަހަރީ އާމްދަނީގެ ހައެއް އިންސައްތައާ ހަމައަށް ޖޫރިމަނާ ކުރުމުގެ ބާރު އީޔޫ އަށް ލިބިގެންވެއެވެ.