އެމެރިކާ ރަސްމީކޮށް ދުނިޔޭގެ ސިއްހަތު ޖަމްއިއްޔާއިން ވަކިވެއްޖެ

ދުނިޔޭގެ ސިއްހަތު ޖަމްއިއްޔާ (ޑަބްލިޔު.އެޗް.އޯ) ގެ ގަވާއިދުގައިވާ ގޮތުގެ މަތިން، އެ ޖަމްއިއްޔާއިން ވަކިވާނެކަމުގެ އެއް އަހަރު ދުވަހުގެ ނޯޓިސްގެ މުއްދަތު ހަމަވުމާއެކު، އެމެރިކާ ރަސްމީކޮށް އެ ޖަމްއިއްޔާއިން ވަކިވެއްޖެއެވެ. 2025 ވަނަ އަހަރުގެ ކުރީކޮޅު ޓްރަމްޕްގެ ސަރުކާރުން ހުށަހެޅި ރަސްމީ ނޯޓިސްއާ ގުޅިގެން، މި ނިންމުމަށް އަމަލުކުރަން ފަށާފައިވަނީ 22 ޖެނުއަރީ 2026 ގަ އެވެ.

މި ވަކިވުމަކީ ޑޮނަލްޑް ޓްރަމްޕް ސޮއިކުރެއްވި ރިޔާސީ ގަރާރެއްގެ ދަށުން ނިންމި ނިންމުމެކެވެ. މި ގަރާރުގައިވާ ގޮތުން، އެމެރިކާއިން އެ ޖަމްއިއްޔާގައި ބައިވެރިވުން ނިމުމަކަށް ގެނެސް، އެ ތަނަށް ދެމުންދާ މާލީ އެހީތެރިކަމާއި އިންސާނީ ވަސީލަތްތަކުގެ އެހީ މެދުކަނޑާލަން ޖެހެ އެވެ. އެމެރިކާ ސަރުކާރުން ހާމަކުރި ގޮތުގައި، މި ފިޔަވަޅު އަޅަން ޖެހުނީ ސިއްހީ ބޮޑެތި ކަންކަމުގައި އެ ޖަމްއިއްޔާއިން އަމަލުކުރި ގޮތާ މެދު ހުރި ކަންބޮޑުވުންތަކުގެ ސަބަބުންނާއި، ގެންނަންޖެހޭ މުހިންމު އިސްލާހުތައް ގެނައުމުގައި ޖަމްއިއްޔާ ނުކުޅެދިފައިވާ ކަމަށް ގަބޫލުކުރެވޭތީ އެވެ.

އެމެރިކާއަކީ ޑަބްލިޔު.އެޗް.އޯ އަށް އެންމެ ބޮޑު މާލީ އެހީއެއް ފޯރުކޮށްދޭ ގައު މެވެ. އެއީ އެ ޖަމްއިއްޔާގެ މުޅި ބަޖެޓުގެ ގާތްގަނޑަކަށް 18 އިންސައްތަ އެވެ.

މީގެ ފަހުން ވޮޝިންގްޓަނުން އެ ޖަމްއިއްޔާއަށް އެއްވެސް މާލީ އެހީއެއް ނުދޭނެ އެވެ. އަދި ރަސްމީ އެއްބާރުލުން ދިނުންވެސް މިއަދުން ފެށިގެން ހުއްޓޭނެ އެވެ. މިކަމުގެ ސަބަބުން، ދުނިޔޭގެ ފެންވަރުގައި ބަލިތައް މޮނިޓާކުރުމަށާއި ކުއްލި ސިއްހީ ހާލަތްތަކަށް އިޖާބަދިނުމަށް ކުރާ މަސައްކަތްތަކަށް ނޭދެވޭ އަސަރުކޮށްފާނެތީ، ސިއްހީ ދާއިރާގެ މާހިރުން ވަނީ ކަންބޮޑުވުން ފާޅުކޮށްފަ އެވެ.

މި ނިންމުމާ ގުޅިގެން ޑަބްލިޔު.އެޗް.އޯ އިން ވަނީ ހިތާމަ ފާޅުކޮށްފަ އެވެ. އަދި އެމެރިކާ ވަކިވުމުގެ ސަބަބުން ކުރިމަގުގައި ދިމާވެދާނެ ސިއްހީ ނުރައްކާތަކުގައި ބައިނަލްއަގުވާމީ ގޮތުން ގުޅިގެން މަސައްކަތްކުރުމުގެ ބާރު ދެރަވެގެން ހިނގައިދާނެ ކަމުގެ އިންޒާރު އެ ޖަމްއިއްޔާއިން ވަނީ ދީފަ އެވެ. މީގެ އިތުރުން، އެހެން ވަސީލަތްތައް މެދުވެރިކޮށް ގުޅިގެން މަސައްކަތްކުރުމުގައި ދެމިތިބުމަށްވެސް އެ ޖަމްއިއްޔާއިން ވަނީ ބާރުއަޅާފަ އެވެ.