ކިހިނެއް: ޕޮޓެއްގައި އަނބުގަސް ހައްދާނެ ގޮތް
އަނބުގަހަކީ އާންމުކޮށް ބޮޑެތި ބަގީޗާތަކުގައި ހައްދާ އެއްޗެއް ކަމަށް ހީވި ނަމަވެސް، އެކަށީގެންވާ ފަރުވާއާއެކު ގަސްކޮށި ނުވަތަ ޕޮޓެއްގައި ވެސް އަނބުގަސް ހެއްދިދާނެއެވެ.
މިއީ މިހާރު އެކި ގައުމުތަކުގައި ކާމިޔާބުކަމާއެކު ކޮށްފައިވާ ކަމެކެވެ. ހާއްސަކޮށް މާލެސިޓީ ފަދަ ޖާގަ ކުޑަ ތަންތަނުގައި ދިރިއުޅޭ މީހުންނަށް ވެސް ކުރެވިދާނެ ވަރަށް ފައިދާހުރި މަސައްކަތެކެވެ.
އޮށް ތައްޔާރުކުރުމާއި އިންދުން
އަނބުގަހެއް ހެއްދުމުގެ ފުރަތަމަ މަރުހަލާއަކީ ރަނގަޅު އޮށެއް ހޯދުމެވެ. މިގޮތުން ދޮންވެފައިވާ މޭވާއަކުން ތާޒާ އަނބު އޮށެއް ނަގައި، އޭގެ ބޭރުގައި ހުންނަ މަސްތައް ރަނގަޅަށް ސާފުކޮށްލަން ޖެހެއެވެ. އޮށް އިންދުމުގެ ކުރިން އޭގެ ބޭރު ތޮށިގަނޑު ފަޅާލައި އެތެރޭގައި އޮންނަ އޮށް ނަގައިގެން އިންދުމުން ގަސް ފަޅާލުން އަވަސްވެގެންދެއެވެ.
ގަސްކޮށްޓާއި ފަސްގަނޑު އިޚްތިޔާރުކުރުން
އަނބުގަހުގެ މޫތައް ރަނގަޅަށް ފެތުރުމަށްޓަކައި، ފެން ފޭދޭނެ ލޯވަޅު ހުރި ފުން ގަސްކޮށްޓެއް ބޭނުންކުރަން ޖެހެއެވެ. ގަސްކޮށީގައި އަނބުގަސް ރަނގަޅަށް ހެދުމަށްޓަކައި އާދައިގެ ފަހާއި، ކޮމްޕޯސްޓް (ގަސްކާނާ) އަދި ފިނޮޅުވެލި އެއްކޮށްފައިވާ ފަސްގަނޑެއް ބޭނުންކުރުން މުހިންމެވެ. މީގެ ސަބަބުން ފަސްގަނޑުގެ ތެރޭގައި ވައި ދައުރުވުމަށާއި ފެން ހަރުނުލައި ފޭދިގެން ދިއުމަށް އެހީތެރިވެދެއެވެ.
އިރުގެ އަލި އަދި ފެންދިނުން
ދުޅަހެޔޮކޮށް ގަސް ހެދުމަށްޓަކައި ދުވާލަކު މަދުވެގެން 6-8 ގަޑިއިރުގެ އިރުގެ އަލި އަނބުގަހަށް ބޭނުންވެއެވެ. އެހެންކަމުން ގަސްކޮށި ބަހައްޓަންވާނީ އަބަދުވެސް އަވި ލިބޭ ފަދަ ތަނެއްގައެވެ. ފެން ދިނުމުގައި ފަސްގަނޑު ކުޑަކޮށް ތެތްކޮށް ބެހެއްޓުން މުހިންމެވެ. ހާއްސަކޮށް ގަސް ހެދެމުން އަންނަ ކުރީކޮޅުގައި ގަވާއިދުން ފެން ދޭންވާނެއެވެ. ނަމަވެސް ފެންބޮޑުވެފައި އޮތަ ނުދިނުމަށް ސަމާލުކަން ދޭންޖެހެއެވެ.
ގަސް ބެލެހެއްޓުމާއި ކޮށުން
ގަވާއިދުން ގަސް ކޮށައި މަސަލަސްކުރުމަކީ ގަހުގެ ސައިޒު ކޮންޓްރޯލްކުރުމަށާއި ގޮފިތައް ދުޅަހެޔޮކޮށް ހެދުމަށް އެހީތެރިވެދޭނެ ކަމެކެވެ. ޕޮޓެއްގައި ހައްދާ ގަހެއްނަމަ، ގަސް މާ ބޮޑަށް އުސްވިޔަ ނުދީ ވަކި ވަރެއްގައި ބެހެއްޓުމަށް ކޮށުމަކީ ކޮންމެހެން ކުރަންޖެހޭ ކަމެކެވެ. މީގެ އިތުރުން ގަވާއިދުން ގަސްކާނާ އެޅުމަކީ ގަސް ހެދުމަށް ބޭނުންވާ ނިއުޓްރިއެންޓްސް ލިއްބައިދޭނެ ކަމެކެވެ.
ކުޑަ ޖާގައެއްގައި ވެސް ރަނގަޅު ފަރުވާއާއި ކެތްތެރިކަމާއެކު އަނބުގަހެއް ހެއްދިދާނެއެވެ. މިއީ ހަމައެކަނި މޭވާ ހޯދުމުގެ އިތުރުން، ގޭގެ ގޯތިތެރެ ނުވަތަ ބެލްކަނީ ފެހިކޮށް ބޭއްވުމަށް ލިބޭ ރަނގަޅު ފުރުސަތެކެވެ. ރަނގަޅަށް ބަލަހައްޓައިފިނަމަ، ތިޔަ އިންދާ އަނބުގަސް ފަހުން މޭވާ އަޅާ ބޮޑު ގަހަކަށް ވެގެންދާނެއެވެ.
ރިއެކްޓް