އީރާނާއި ހިޒްބުﷲ އާއެކު ކުރާ ހަނގުރާމަ ދިގުލައިގެން ހިނގައިދާނެ: އިސްރާއިލް

އީރާނާއި ހިޒްބުﷲ އާއެކު މިހާރު ކުރަމުންދާ ހަނގުރާމަ އަދި އެތައް ހަފުތާއަކަށް ދެމިގެންދާނެ ކަމަށް ބެލެވޭ ކަމަށް ބުނެ، ސަރަހައްދީ ހަމަނުޖެހުން ބޮޑުވެ ދިގުލައިގެން ހިނގައިދާނެ ކަމުގެ ބިރު އޮތްކަން އިސްރާއީލުގެ އަސްކަރިއްޔާއިން ހާމަކޮށްފިއެވެ.

އިސްރާއީލު އަސްކަރިއްޔާގެ ތަރުޖަމާނަކު ބުނީ، އެކި ފްރަންޓްތަކުގައި އޮޕަރޭޝަންތައް ވަރުގަދަވަމުންދާތީ، "އަދި އެތައް ހަފުތާއެއްގެ ހަނގުރާމައަށް" ގައުމު ތައްޔާރުވާންޖެހޭ ކަމަށެވެ. މި އިއުލާން އައިސްފައިވަނީ އިސްރާއީލުގެ ފައުޖުތަކުން ވައިގެ މަގުންނާއި އެއްގަމު މަގުން ހިންގާ އޮޕަރޭޝަންތައް ފުޅާކޮށް، ހިޒްބުﷲގެ މަރުކަޒުތަކަށް އަމާޒުކޮށް ލުބުނާނުގެ ދެކުނުގެ އެތެރެއަށް ވަދެގަންނަމުންދާ ދަނޑިވަޅެއްގައެވެ.

އަސްކަރީ އޮފިޝަލުން އިޝާރާތް ކުރެއްވި ގޮތުގައި މި ހަނގުރާމަ އަދި އޮތީ ކުރީކޮޅުގައެވެ. އަދި ކުރިއަށް އޮތްތަނުގައި އިތުރު ހަމަލާތައް ދިނުމަށް ވަނީ ރޭވިފައެވެ.

ހަމައެއާއެކު، އީރާނާއެކު އޮތް ފުޅާ ހަމަނުޖެހުންވެސް ދަނީ އިތުރަށް ގޯސްވަމުންނެވެ. އިސްރާއީލާއި އެމެރިކާގެ ފައުޖުތަކުން އީރާނުގެ އުމްރާނީ ވަސީލަތްތަކަށް ވަރުގަދަ ހަމަލާތަކެއް ދީފައިވާއިރު، އިރާނުން ވަނީ އިސްރާއީލުގެ ސަރަހައްދުތަކަށް މިސައިލާއި ޑްރޯން ހަމަލާތަކުން ރައްދުދީފައެވެ. މީގެ ސަބަބުން އާންމުންނަށް އަނިޔާވެ، ހަމަނުޖެހުން އިތުރަށް ފުޅާވުމުގެ ނުރައްކާ ވަނީ ބޮޑުވެފައެވެ.

ހިޒްބުﷲ އިން ވެސް ވަނީ ލުބުނާނުގެ ބޯޑަރު ހުރަސްކޮށް ދޭ ހަމަލާތައް ވަރުގަދަކޮށް، ދެވަނަ ފްރަންޓެއް ހުޅުވާފައެވެ. މީގެ ސަބަބުން އިސްރާއީލުގެ އަސްކަރީ ސަމާލުކަން ދެބަޔަށް ބަހާލަން ވަނީ މަޖުބޫރުވެފައެވެ. އެ ޖަމާއަތުން ބުނާ ގޮތުގައި އެމީހުންގެ މި އަމަލުތަކަކީ އީރާނަށް ތާއީދުކުރުމުގެ ގޮތުން ކުރާ ކަންކަމެވެ. މިއީ ހަމަނުޖެހުން ކޮންޓްރޯލް ކުރުމަށް ކުރާ މަސައްކަތްތަކަށް އިތުރު ގޮންޖެހުންތަކެއް ކުރިމަތިވާ ކަމެކެވެ.

ސްޓްރެއިޓް އޮފް ހޯރްމޫޒް ފަދަ ހަކަތަ ފޯރުކޮށްދޭ މުހިންމު މަގުތަކަށް ނުރައްކާވެ، ގަލްފުގެ ގައުމުތަކުގެ އުމްރާނީ ވަސީލަތްތަކަށް ހަމަލާދީފާނެ ކަމުގެ އިންޒާރުތަކާއެކު، ސަރަހައްދީ ނުތަނަވަސްކަން މިހާރު ވަނީ ފާއިތުވި އަހަރުތަކުގައި ނުދާހާ މައްޗަށް ގޮސްފައެވެ. ދިގުލައިގެންދާ ހަނގުރާމައެއްގެ ސަބަބުން ދުނިޔޭގެ އިގްތިސާދަށާއި ސަލާމަތަށް ބޮޑެތި ނޭދެވޭ އަސަރުތަކެއް ކޮށްފާނެ ކަމަށް ދިރާސާކުރާ ފަރާތްތަކުން އިންޒާރުދެއެވެ.

އިސްރާއީލުގެ އޮފިޝަލުން ވިދާޅުވާ ގޮތުގައި އެމީހުންގެ މަގްސަދަކީ އީރާނާއި އެގައުމާ ގުޅިފައިވާ ގްރޫޕްތަކުން ނުރައްކަލެއް ކުރިމަތި ނުކުރެވޭ މިންވަރަށް އެފަރާތްތައް ބަލިކަށިކޮށްލުމެވެ. ނަމަވެސް، ހަނގުރާމަ ނިމޭނެ އަވަސް ގޮތެއް ފެންނަން ނެތްއިރު، އެންމެ ފަހުގެ އިންޒާރުތަކުން ދޭހަވަނީ މި ހަމަނުޖެހުން ކުރިއަށް އޮތް ހަފުތާތަކަށް ނުވަތަ އެއަށްވުރެ ދިގު މުއްދަތަކަށް ދެމިގެންދާނެ ކަމެވެ.