ހޫތީން ހަނގުރާމައިގެ ތެރެއަށް ވަނުމާއިއެކު ކަނޑުގެ މައި ދެމަގު ބަންދުވެދާނެކަމުގެ ބިރު

އެމެރިކާ-އިޒްރޭލާއި އީރާނާ ދެމެދު ހިނގަމުންދާ ހަނގުރާމައިގެ ތެރެއަށް ޔަމަނުގެ ހޫތީން ވަނުމަކީ ދުނިޔޭގެ ވިޔަފާރީގެ މުހިންމު ކަނޑުގެ މައި ދެ މަގެއް ބަންދުވެ، ބައިނަލްއަގުވާމީ އިގްތިސާދަށް ބޮޑު ލޮޅުމެއް އަރާފާނެ ކަމެއް ކަމަށް މާހިރުން އިންޒާރު ދީފިއެވެ.

ދޯހާ އިންސްޓިޓިއުޓް ފޯ ގްރެޖުއޭޓް ސްޓަޑީޒްގެ ޕްރޮފެސަރު މުހައްމަދު އެލްމަސްރީ ވިދާޅުވި ގޮތުގައި، ހޫތީން ބާބުލް މަންދަބް ކަނޑުއޮޅި ބަންދުކޮށްފިނަމަ، ގަލްފް އޮފް އަދަނުން ރަތް ކަނޑާއި ސުއޭޒް ކެނަލްއަށް ވަދެ ނިކުމެވޭނެ މަގާއި ހޮރުމޫޒާއި މެޑިޓަރޭނިއަން ކަނޑު ގުޅުވައިދޭ މަގު ބަންދުވެ، ދުނިޔޭގެ ވިޔަފާރިއަށް ބޮޑެތި ގޮންޖެހުންތައް ކުރިމަތިވެދާނެއެވެ.

އެލްމަސްރީ އަލްޖަޒީރާއަށް ދެއްވި ބަސްދީގަތުމެއްގައި ވިދާޅުވީ، ވޭތުވެދިޔަ ދެ އަހަރާއި ބައިގެ ތެރޭގައި ހޫތީންނަކީ ބޮޑު ބާރެއްކަން ސާބިތުކޮށްދީފައިވާ ކަމަށެވެ. "ހޫތީން ބާބުލް މަންދަބް ބަންދުކުރަން ނިންމައިފިނަމަ، ހޮރުމޫޒް ކަނޑުއޮޅިއާއި ސުއޭޒް ކެނަލްއާ ދެމެދު އޮތް ދުނިޔޭގެ ޝިޕިންގްގެ އެންމެ މުހިންމު އެއް ދޮރު މަގު ބަންދުވާނެ،" އޭނާ ވިދާޅުވިއެވެ. ދުނިޔޭގެ ވިޔަފާރީގެ 12 އިންސައްތަ އަދި ތެލުގެ 10 އިންސައްތަ ސުއޭޒް ކެނަލް މެދުވެރިކޮށް އުފުލާއިރު، ހޮރުމޫޒް ކަނޑުއޮޅިއަކީ ދުނިޔޭގެ ތެލުގެ 20 އިންސައްތަ ސަޕްލައި ކުރާ މަގެވެ.

ހޫތީންގެ އަސްކަރީ ތަރުޖަމާނު ޔަހްޔާ ސަރީއު ވިދާޅުވި ގޮތުގައި، އިޒްރޭލުގެ ނާޒުކު އަދި މުހިންމު ސަރަހައްދުތަކަށް އަމާޒުކޮށް ހޫތީން މިހާރު ވެސް ވަނީ މިސައިލް ހަމަލާއެއް ދީފައެވެ. މިއީ މި ހަނގުރާމައިގައި ހޫތީން ސީދާ ގޮތުން ބައިވެރިވެ ދިން ފުރަތަމަ ހަމަލާއެވެ. މި ހަމަލާތަކުގެ ސަބަބުން އިޒްރޭލުގެ ވައިގެ ދިފާއީ ނިޒާމަށް ބާރު ބޮޑުވެފައިވާ ކަމަށާއި، ޔަމަނުން އަންނަ ހަމަލާތަކުގެ ސަބަބުން މަސްރަހު އިތުރަށް ނުރައްކާވެގެންދާނެ ކަމަށް އެލްމަސްރީ ފާހަގަކުރެއްވިއެވެ.

މި ހަމަލާތަކާ ގުޅިގެން އީރާނުން ރަސްމީ ބަހެއް ބުނެފައި ނުވި ނަމަވެސް، މިއީ އީރާނުން މަރުހަބާ ކިޔާނެ ކަމެއް ކަމަށް މަސްރަހު ދިރާސާކުރާ ފަރާތްތަކުން ބުނެއެވެ. އީރާނުން އަބަދުވެސް ބުނަމުންދަނީ ހޫތީންނަކީ މިނިވަންކަމާއެކު ނިންމުންތައް ނިންމާ ބައެއް ކަމަށެވެ. ނަމަވެސް، ކަނޑުގެ މުހިންމު މަގުތަކަށް ހޫތީން ނުފޫޒު ފޯރުވުމަކީ އެމެރިކާ އާއި އިޒްރޭލާ ދެކޮޅަށް އީރާނަށް ލިބޭ ބޮޑު ބާރެއް ކަމަށް ބެލެވެއެވެ.

ހަތަރު ހަފުތާއަށް ދެމިގެން ގޮސްފައިވާ މި ހަނގުރާމައިގެ ސަބަބުން ދުނިޔޭގެ ބާޒާރުގައި ތެޔޮ ފީފާއެއްގެ އަގު މިހާރު ވަނީ 112 ޑޮލަރަށް ވުރެ މައްޗަށް ގޮސްފައެވެ. މީގެ ސަބަބުން ދުނިޔޭގެ އިންފްލޭޝަން މަތިވެ، އިގްތިސާދީ ގޮތުން ބޮޑެތި ގޮންޖެހުންތަކެއް ކުރިމަތިވެދާނެ ކަމުގެ ބިރު ވަނީ ހީވެފައެވެ. އަދި އިޒްރޭލުން މި ހަނގުރާމަ ފުޅާކުރަން ބޭނުންވާ ކަމަށާއި، އެމެރިކާގެ ސިޔާސީ މަސްރަހަށް އަންނަ ބަދަލުތަކުގެ ކުރިން އެމީހުންގެ ލަނޑުދަނޑިތައް ހާސިލްކުރަން މަސައްކަތް ކުރަމުންދާ ކަމަށް ވެސް މާހިރުން ފާހަގަކުރެއެވެ.